رووداو دیجیتاڵ
بەڕێوەبەری پۆلیسی پارێزگای ورمێ دەڵێت، لە دەروازەی سنووریی تەمەرچین - حاجی ئۆمەران، دەست بەسەر یەک کیلۆگرام زێڕی قاچاخدا گیراوە و چوار کەسیش بە تۆمەتی بەقاچاخبردنی دەستگیر کراون.
رەحیم جەهانبەخش، بەڕێوەبەری پۆلیسی پارێزگای ورمێ رایگەیاند، رۆژی دووشەممە زانیارییان پێگەیشت کە ژمارەیەک قاچاخچی دەیانەوێت لە رێگەی دەروازەی سنووریی تەمەرچینەوە بڕێک زێڕ هەناردە بکەن، بۆیە رێکارەکانیان تووندتر کرد و پشکنیان لە سنوورەکە زیاتر کرد.
بەڕێوەبەری پۆلیسی پارێزگای ورمێ گوتی، لە ئەنجامی پشکنینەکاندا لە دەروازەی سنووریی تەمەرچین دەست بە سەر یەک کیلۆگرام زێڕی عەیار 24دا گیرا، چوار کەسیش بە تۆمەتی بەقاچاخبردنی زێڕ لەلایەن هێزە ئەمنییەکانی دەروازە سنوورییەکەوە دەستگیر کران.
بە گوتەی رەحیم جەهانبەخش، ئەو زێڕە قاچاخەی لە سنووری تەمەرچین - حاجی ئۆمەران دەستی بەسەردا گیراوە، بایی شەش ملیار تمەنە کە دەکاتە نزیکەی 100 هەزار دۆلار.
بەڕێوەبەری پۆلیسی پارێزگای ورمێ دەڵێت، چوار تۆمەتبارەکە و زێڕەکەش رادەستی لایەنە پەیوەندیدارەکانی دەسەڵاتی دادوەریی شاری پیرانشار کراون.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ