هەڵەیەک روویدا! دووبارە هەوڵبدە
رووداو دیجیتاڵ
وەزارەتی کارەبا دەڵێ، دوو رۆژ تاقیکردنەوەی گوشاری سەر تۆڕی کارەبای نیشتمانی لە سنووری پارێزگای سلێمانی دەکرێ. گوتەبێژی کارەبای سلێمانی دەڵێت: "بە بەردەوامی کارەبا دەدرێتە هاووڵاتییانی پارێزگاکانی سلێمانی، هەڵەبجە، ئیدارەکانی راپەڕین و گەرمیان."
رۆژی سێشەممە، 09ـی ئەیلوولی 2025، وەزارەتی کارەبای هەرێمی کوردستان لە راگەیێندراوێکدا بڵاویکردەوە: "تاقیکردنەوەی گوشاری سەر تۆڕی کارەبای نیشتمانی لە پارێزگای سلێمانی ئەنجام دەدرێ. ئەم تاقیکردنەوەیە ناوچەکانی ناوەوە و دەرەوەی پڕۆژەی رووناکی دەگرێتەوە."
لەبارەی ئامانجی ئەم تاقیکردنەوەیە، وەزارەتی کارەبا گوتی: "رێکارێکی رۆتینییە کە لەلایەن وەزارەتی کارەباوە بۆ تۆڕی کارەبا ئەنجامدەدرێ، بە مەبەستی دیاریکردنی کێشە و خاڵە لاوازەکانی تۆڕەکانی گواستنەوە و دابەشکردنی کارەبا لە دوو رۆژی تاقیکردنەوەکە کە تێیدا هاووڵاتییان کارەبای بەردەوامیان دەبێت."
هەر لەو بارەوە سیروان محەممەد، گوتەبێژی بەڕێوەبەرایەتیی گشتیی کارەبای سلێمانی بە رووداوی گوت: "ئەم تاقیکردنەوەیە بە مەبەستی خۆئامادەکردنە بۆ وەرزی زستان. لەم تاقیکردنەوەیەدا دوو رۆژ بە بەردەوامی کارەبا دەدرێتە هاووڵاتیان، تاوەکو گوشار لەسەر کارەبا دروستبێت و هەر کێشەیەکی هەبێت، دەربکەوێ."
بە گوتەی سیروان محەممەد، تاقیکردنەوەکە تەنیا پارێزگای سلێمانی ناگرێتەوە، بەڵکو پارێزگای هەڵەبجە و ئیدارە سەربەخۆکانی راپەڕین و گەرمیانیش دەگرێتەوە؛ گوتیشی: "تاقیکردنەوەکە لە رۆژانی 10 و 11ـی ئەیلوول دەبێ."
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ