کوردستان
راماڵینی بەفر لە رێگەکانی نێوان ناوچەکانی سنووری ئیدارەی سەربەخۆی سۆران. وێنە: پەیجی ئیدارەی سەربەخۆی سۆران لە فەیسبووک
رووداو دیجیتاڵ
دوای ئەوەی ئەمڕۆ بەهۆی بەفر بارینی شەوی رابردووەوە لە سنووری ئیدارەی سەربەخۆی سۆران لە پارێزگای هەولێر، ئاستەنگی هاتووچۆ بۆ رێگەی سەنتەری سۆران بۆ قەزاکانی سنوورەکە دروستبوو؛ جێگری سەرپەرشتیاری ئیدارەکە دەڵێت، هاتووچۆ ئاسایی بووەتەوە.
حەکیم تێلی، جێگری سەرپەرشتیاری ئیدارەی سەربەخۆی سۆران، ئەمڕۆ شەممە بە تۆڕی میدیایی رووداوی گوت، "جگە لە رێگەی زینی وەرتێ کە داخراوە، ئێستا تەواوی رێگەکانی سنووری ئیدارەکەمان کراوەن."
رەوەند مەغدید، گوتەبێژی بەرگریی شارستانی سۆران، ئەمڕۆ شەممە بە تۆڕی میدیایی رووداوی گوت، بەهۆی بەفربارینەوە رێگەی زینی وەرتێ داخراوە، کە ئیدارە سەربەخۆکانی سۆران و راپەڕین پێکەوە دەبەستێتەوە.
گوتەبێژی بەرگریی شارستانیی سۆران گوتی، "رێگەی سەنتەری سۆران بۆ قەزاکانی مێرگەسۆر، سیدەکان و چۆمان بەهۆی بەفرەوە ئاستەنگیی تەواویان بۆ دروستبووە و داوا دەکەین ئێستا هاونیشتمانییان هاتووچۆی پێدا نەکەن."
بەگوێرەی راگەیێندراوی ئەمڕۆ شەممەی کەشناسیی هەرێمی کوردستان، لە 24 کاژێری رابردوودا لەم ناوچانەی ئیدارەی سەربەخۆی سۆران بەفر باریوە:
- مێرگەسۆر: 35 سانتیمەتر
- سۆران: 5 سانتیمەتر
- سیدەکان 8 سانتیمەتر
- حاجی ئۆمەران 14 سانتیمەتر
- رەواندز: 6 سانتیمەتر
- بارزان: 4 سانتیمەتر
- خەلیفان: 3 سانتیمەتر
- چۆمان 1 سانتیمەتر
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ