رووداو دیجیتاڵ
لە رووداوێکی هاتووچۆدا لەسەر رێگەی ئیلام - سراوڵەی سەر بە پارێزگای ئیلامی رۆژهەڵاتی کوردستان، دوو کەس گیانیان لەدەستدا. بەڕێوەبەری پۆلیسی هاتووچۆی پارێزگاکە دەڵێت، "نەبوونی هێمای ئاگادارکردنەوە و لادان بۆ سایدی بەرامبەر، هۆکاری رووداوەکە بووە."
ئەمڕۆ هەینی 10-05-2024 لە رێگەی ئیلام - سراوڵەی سەر بە پارێزگای ئیلامی رۆژهەڵاتی کوردستان، بەهۆی پێکدادانی دوو ئۆتۆمبێل لە جۆری پیکاپ (نیسان وانێت - پەیکان وانێت) دوو کەس گیانیان لەدەستدا.
ئەبولفەزڵ کەهزادی، بەڕێوەبەری پۆلیسی هاتووچۆی پارێزگای ئیلام رایگەیاند، "هۆکاری سەرەکیی رووداوەکە، نەبوونی تابلۆ و هێماکانی ئاگادارکردنەوە لەنزیک ئەو کارگەیە بووە، کە ئۆتۆمبێلەکان لەوێ پێکیاندا داوە."
بەڕێوەبەری پۆلیسی هاتووچۆی پارێزگای ئیلام باسی لە تیژڕۆیی و لادانی یەکێک لە ئۆتۆمبێلەکان بۆ سایدی بەرامبەر کرد و گوتی، "هەموو کات 50%ی هۆکاری رووداوەکان دەگەڕێتەوە بۆ سەرپێچیکردن لە رێنوێنییەکان."
جگە لە گیانلەدەستدراوان، دوو سەرنشینی دیکەش بریندار بوون و گواستراونەتەوە بۆ نەخۆشخانەیەکی شاری ئیلام.
رۆژی 7ی نیسانی 2024 ئەحمەد شیرانی، بەڕێوەبەری ناوەندی زانیاری و کۆنترۆڵی ترافیکی پۆلیسی هاتووچۆی ئێران رایگەیاند، لە سەرەتای نەورۆزەوە تائێستا 100 هەزار رووداوی هاتووچۆ لەو وڵاتە روویانداوە و بەهۆیەوە 813 کەس گیانیان لەدەستداوە و 21 هەزار و 441 کەسیش بریندار بوون.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ