رووداو دیجیتاڵ
پارێزگاری هەڵبژێردراوی کەرکووک دەڵێت، "لە ئەمڕۆ بەدواوە قۆناخێکی نوێ لە کەرکووک دەستپێدەکات، ئەویش قۆناخی هێنانەکایەی ئاشتی و ئاوەدانی و خزمەتکردنی هەموو هاووڵاتییانە بێ جیاوازی".
رێبوار تەها، پارێزگاری هەڵبژێردراوی کەرکووک رایگەیاند، "هەموو هەوڵەکانمان دەخەینەگەڕ لە پێناو چەسپاندنی ئاسایش و سەقامگیری و بەرزکردنەوەی ئاستی خزمەتگوزارییەکان و بووژاندنەوەی ژێرخانی ئابووری و برەودان بە کەرتە جیاجیاکان و بەگەڕخستنی سەرچاوە دەوڵەمەندەکانی کەرکووک بۆ باشترکردنی بژێویی ژیانی هاووڵاتییان"
لە کۆبوونەوەی رۆژی شەممە، 10-08-2024ـی ئەنجوومەنی پارێزگای کەرکووک کە لە هۆتێل رەشید لە بەغدا کرا، رێبوار تەها بە پارێزگار و محەممەد حافز بە سەرۆکی ئەنجوومەنی پارێزگای کەرکووک هەڵبژێردران.
رێبوار تەها لەبارەی پۆستەکەی دەڵێت: "ئەم پێگەیە دەکەینە ئامرازێک بۆ بەرقەرارکردنی ئاشتەوایی سیاسی و کۆمەڵایەتی و بەهێزکردنی یەکترقبووڵکردن و پێکەوەکارکردن و پتەوکردنی برایەتی و پێکەوەژیان لەنێوان سەرجەم پێکهاتەکانی کەرکووک بێ جیاکاری".
دەقی راگەیێندراوەکەی رێبوار تەها، پارێزگاری هەڵبژێردراوی کەرکووک:
هاووڵاتییانی ئازیزی کەرکوک، هێز و لایەنە سیاسییەکان..
هەموو لایەك دڵنیا دەكەینهوه لە ئەمڕۆ بە دواوە قۆناخێکی نوێ لە کەرکوک دەستپێدەکات، کە ئەویش قۆناخی هێنانەکایەی ئاشتی و ئاوەدانی و خزمەتکردنی هەموو هاووڵاتییانە بێ جیاوازی.
هەر لێرەشەوە رایدەگەیەنین کە هەموو هەوڵەکانمان دەخەینەگەڕ لە پێناو چەسپاندنی ئاسایش و سەقامگیری و بەرزکردنەوەی ئاستی خزمەتگوزارییەکان و بوژاندنەوەی ژێرخانی ئابووری و برەودان بە کەرتە جیاجیاکان و بەگرخستنی سەرچاوە دەوڵەمەندەکانی کەرکوک بۆ باشترکردنی بژێوی ژیانی هاووڵاتییانی خۆشەویستی شاری کەرکوک.
هاوکات دووپاتیدەکەینەوە ئەم پێگەیە دەکەینە ئامرازێک بۆ بەرقەرارکردنی ئاشتەوایی سیاسی و کۆمەڵایەتی و بەهێزکردنی یەکترقبوڵکردن و پێکەوەکارکردن و پتەوکردنی برایەتی و پێکەوەژیان لە نێوان سەرجەم پێکهاتەکانی کەرکوک بێ جیاکاری.
هەروەها جەختدەکەینەوە پارێزگاری داهاتووی کەرکوک، پارێزگاری کورد، عەرەب، تورکمان، مەسیحییەکان، هەموو چین و توێژەکانی کەرکوک دەبێت بەبێ جیاوازی.
زۆر سوپاس بۆ خۆڕاگری خەڵکی بەئەمەکی کەرکوک، سوپاس بۆ متمانەی ئەندامانی ئەنجومەنی پارێزگای کەرکوک، سوپاس و رێز بۆ پشتیوانی و پشتگیری سەرۆک بافڵ تاڵەبانی و سەرکردایەتی یەکێتیی نیشتمانیی کوردستان، سوپاس بۆ ئەو تیمەی پێکەوەکارمان کرد و پێکەوە سەرکەوتین.
پشتیوان بەخوای گەورە جێی ئەو متمانە گەورەیە دەبین، هەروەها لە ئاست ئەو بەرپرسیاریەتییە گەورەیەش دەبین.
براتان
رێبوار تەها
١٠
-٨-٢٠٢٤
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ