رووداو دیجیتاڵ
پێشمەرگەیەکی خانەنشین دەڵێت، لە شارەوانیی سەیدسادق پێیانگوتوون زەویتان پێنادرێت، چونکە سوودمەند بوون، بەڵام رەتیدەکاتەوە سوودمەندبووبن و دەڵێت بە پارەی خۆیان زەوییان کڕیوە. قایمقامی قەزاکە دەڵێت، سەردانی بکەن بەدواداچوون بۆ کێشەکەیان دەکات.
عومەر عەبدوڵڵا، پێشمەرگەی خانەنشینی لیوا هاوبەشەکانە و دانیشتووی قەزای سەیدسادقە لە پارێزگای سلێمانی ئەمڕۆ یەکشەممە بە تۆڕی میدیایی رووداوی گوت: "ژمارەیەک پێشمەرگەین و لە شارەوانی دەڵێن زەویتان پێنادرێت سوودمەندبوون، لەکاتێکدا زەیمان بە پارەی خۆمان کڕیوە".
بە گوتەی ئەو هاونیشتمانییە، شارەوانی ئاماژەیان بەوە کردووە: "بەگوێرەی بڕیاری ئەنجوومەنی وەزیران هەرکەس لە دوای ساڵی 1999ـەوە زەوی تاپۆ کردبێت بە ناوی خۆیەوە، بە سوودمەند هەژمار کراوە".
عومەر عەبدوڵڵا دەڵێت: "ئێمە کۆمەڵێک پێشمەرگەین و بە بەڵگەوە دەیخەینەڕوو سوومەند نەبووین، ئێمە بە پارەی خۆمان کاتی خۆی زەویمان کڕیوە و کردوومانەتە خانوو، نازانم بۆ دەبێ سوودمەند نەبین؟".
هەر ئەمڕۆ بەرپرسێک لە وەزارەتی پێشمەرگە بە تۆڕی میدیایی رووداوی گوت: "ئەوە رەتدەکەینەوە، هەرکەس خانوو یان زەوی بە پارەی خۆی کڕی بێت بە سوومەند هەژمار نەکراوە و زەوی پێدەدرێت".
بەگوێرەی بەرپرسەکەی وەزارەتی پێشمەرگە کە ئاگاداری دۆسیەکانە، "بەشێکی پێشمەرگە لە رابردوو لە یەکەکانی 70 یان 80 زەوییان وەرگرتووە و ئێستا پێیانوایە ئەوانە لە دەرەوەی وەزارەت و حکومەتە، بەڵام ناویان تۆمارە و بە سوودمەند دەژمێردرێن".
هەر لەوبارەیەوە رەزا محەممەد، قایمقامی سەیدسادق بە رووداوی گوت: "کڕینی زەوی یان خانوو نابێتە سوودمەندبوون، ئەگەر بە فەرمی سوومەند نەبوون، سەردانمان بکەن لە هۆکارەکەی دەکۆڵینەوە".
قایمقامی سەیدسادق ئاماژەی بەوەشکرد: هەندێک کەس هەن زەوی زێدەڕۆیان هەبووە لەچوارچێوەی یاسا و بڕیارەکانی حکومەتی هەرێمی کوردستان بۆیان تاپۆ کراوە و بە سوودمەندبوو هەژمار کراون، چونکە زەوییەکە زێدەڕۆ بووە، ئەگەر لەو کەسانەبن ئەوە بە سوودمەند هەژمار کراون.
27ـی ئاداری 2024، ئەنجوومەنی وەزیرانی هەرێمی کوردستان بڕیاری دابەشکردنی زەوی بۆ ئەو فەرمانبەر و خانەنشینانە دا، کە سوودمەند نەبوون
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ