سوودانی: هەر کەسێک کە سەلمێنرا و تێوەگلاوە لە رووداوەکانی کەرکووک سزا دەدرێت

 

 

کۆبوونەوەکە شەوی رابردوو، 09-09-2023، بە ئامادەبوونی لەتیف رەشید، سەرۆککۆماری عێراق و محەممەد حەلبووسی، سەرۆکی پەرلەمان لە بەغدا بەڕێوەچوو. 

 

لە کۆبوونەوەکەدا، فوئاد حوسێن، ئەندامی مەکتەبی سیاسی و شاخەوان عەبدوڵڵا، ئەندامی سەرکردایەتی، نوێنەرایەتیی پارتی دیموکراتی کوردستانیان کرد. خالید شوانی، ئەندامی سەرکردایەتی و نزار ئامێدی، وەزیری ژینگەی عێراق، وەکو نوێنەرانی یەکێتیی نیشتمانیی کوردستان بەشدارییان لە کۆبوونەوەی هاوپەیمانیی بەڕێوەبردنی دەوڵەتدا کرد.

 

نووسینگەی سەرۆکوەزیرانی عێراق لە راگەیێندراوێکدا گوتی، کۆبوونەوەکە "سەرکۆنەی رووداوەکانی کەرکووک"ـی کردووە و پێیوایە "هەڕەشە لەسەر ئاشتیی هاووڵاتییان و تێکدانی ئاسایشی ناوچەکە دەکات"، بۆیە جەختکراوەتەوە لەسەر ئەوەی کە "ئەوەی کراوە قبووڵ نەکراوە لەژێر هەر بیانوویەکدا بێت و لەلایەن هەر لایەنێکەوە بێت و پێویستە هەموو لایەنەکان ئەولەویەت بە بەرژەوەندیی باڵای پارێزگاکە و هاووڵاتییانی بدەن و، گوتوبێژ وەک کلیلی رەتکردنەوەی ناکۆکییەکان و پاراستنی پێکەوەژیانی ئاشتییانە لە کەرکووک بمێنێتەوە."

 

وەکو لە راگەیێندراوەکەدا هاتووە، "هاوپەیمانێتیەکە داوای پابەندبوون بە گفتوگۆیەکی نیشتمانی دەکات کە پشتیوانی لە ئارامی و بڵاوکردنەوەی ئاسایش و سەقامگیری لە پارێزگای کەرکوک بکات، کە تایبەتمەندی و هەمەجۆرییەکەی ناسراوە، چونکە سەرچاوەی هێز و شانازییە بۆ هەموو ئایین و نەتەوە و لایەنەکانی عێراق لە پارێزگاکەدا."

 

 

- پێکهێنانی لیژنەیەکی سەرکردایەتی لە هاوپەیمانی بۆ سەردانیکردنی پارێزگای کەرکووک و ئەنجامدانی کۆبوونەوە لەگەڵ لایەنە فەرمی و کۆمەڵایەتییەکان لە هەموو پێکهاتەکانی پارێزگاکە و دۆزینەوەی چارەسەری بەپەلە بۆ کێشەکان، لەسەرەتادا چارەسەرکردنی کێشەی بارەگاکە و، لەگەڵ ئەنجامدانی گۆڕانکاریی ئیداری لە کەرکووک بە شێوەیەک کە هاوسەنگی لەنێوان هەموو پێکهاتەکانیدا بپارێزێت.

 

- پشتیوانیکردن لە بڕیارەکەی ئەنجوومەنی نوێنەران بۆ پێکهێنانی لیژنەیەکی پەرلەمانی لەپێناو لێکۆڵینەوە لە راستییەکانی کەرکووک و جەختکردنەوە لەسەر پێویستیی ئاشکراکردنی ئەنجامەکانی لێکۆڵینەوەکە بۆ رای گشتی و سزادانى هەر کەسێک کە سەلمێنرا و تێوەگلاوە لە رووداوەکان و سەر بە هەر لایەنێک بێت.

 

- پابەندبوونی لایەنەکانی هاوپەیمانیی بەڕێوەبردنی دەوڵەت بۆ ئەو رێککەوتنە سیاسییەی کە لە بەرنامەی وەزیراندا جێگیرکراوە و، لەگەڵ دەستوور و یاسادا هاوسەنگە و لە ئەنجوومەنی نوێنەران دەنگی لەسەر دراوە.

 

- راگرتنی شەڕی میدیا و گفتوگۆکردن لەسەر جیاوازیی را و بۆچوونەکان لەنێو هاوپەیمانیی بەڕێوەبردنی دەوڵەت.

 

- پابەندبوون بە ئەنجامدانی هەڵبژاردنی ئەنجومەنی پارێزگاکان بەو شێوەیەی کە بڕیارە لە کانوونی یەکەمی داهاتوودا ئەنجام بدرێت و، هەروەها لە پارێزگای کەرکووکیش ئەنجام بدرێت.

 

- پشتگیریکردن لە بڕیارەکەی ئەنجوومەنی نوێنەران بۆ میوانداریکردنی وەزیرانی دارایی حکومەتی فیدراڵی و حکومەتی هەرێمی کوردستانی عێراق.