کوردستان
وێنەیەکی ئاگرەکە و تیمەکان لەکاتێکدا خەریکی کوژاندنەوەین، وێنە: بەڕێوەبەرایەتیی پۆلیسی دارستان و ژینگەی پارێزگای سلیمانی:
رووداو دیجیتاڵ
پۆلیسی دارستان و ژینگەی سلێمانی بڵاویکردەوە، بەهۆی ئاگرێکەوە لە سنووری قەزای پێنجوێن، 150 دۆنم پووش و پاوان و دارستانی سرووشتی سووتاون.
بەڕێوەبەرایەتیی پۆلیسی دارستان و ژینگەی پارێزگای سلێمانی ئەمڕۆ (یەکشەممە 10ـی ئەیلوولی 2023) لە راگەیێندراوێکدا رایگەیاند، رۆژی 8ـی ئەیلوول "ئاگر لە گوندەکانی سەرسووراو، میراوا، برالە و سەربرالە لە سنووری ناحیەی گەرمک لە قەزای پێجوێن کەوتەوە و بەهۆیەوە نزیکەی 150 دۆنم و پووش و پاوان و دارستان سووتان".
عەمید هێمن کەمەرخان، گوتەبێژی پۆلیسی دارستان و ژینگەی سلێمانی بە تۆڕی میدیایی رووداوی گوت، پۆلیسی دارستانی گەرمك بەهاوکاریی ئاگرکوژێنەوەی پێنجوێن و خەڵکی گوندەکان توانیویانە ئاگرەکان کۆنترۆڵبکەن. گوتیشی، "تاوەکو ئێستا هۆکاری ئاگرەکە نازاندرێت."
بەگوێرەی ئاماری بەرگری شارستانیی سنوورەکانی هەولێر، دهۆک و هەڵەبجە بۆ رووداو، ئەمساڵ تاوەکو سەرەتای مانگی ئاب 2 هەزار و 155 رووداوی ئاگرکەوتنەوە تۆمارکراون، لەنێویاندا تەنیا لە هەولێر 13 کەس گیانیان لەدەستداوە و 57 کەسیش بریندار بوون.
بەگوێرەی ئاماری پۆلیسی هەرێمی کوردستان، ساڵی رابردوو، حەوت هەزار و 546 رووداوی ئاگرکەوتنەوە لە هەرێمی کوردستاندا تۆمارکرابوون.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ