رووداو دیجیتاڵ
سەرۆکی ئەنجوومەنی باڵای سیاسی و بەرژوەندیی یەکێتیی نیشتمانی کوردستان داوا لە سەرجەم دەزگا راگەیاندنەکان و میدیاکاران دەکات دووربکەونەوە لە بەکارهێنانی زمانی زبر و نەبنە هۆی قووڵکردنەوەی ناکۆکییەکان. دەشڵێت، "لەپێناو یەکڕیزیی ناوماڵی کورد و گەیشتن بە ئامانجە بەدینەهاتووەکانی میلـلەتەکەمان و چارەسەرکردنی کێشەکان لە رێگەی گفتوگۆ و بە ئامانجی خزمەتکردنی گەلەکەمان، پیشەییانە کاربکەن."
رۆژی چوارشەممە، 11-1-2023، بەبۆنەی دەرچوونی یەکەم ژمارەی رۆژنامەی کوردستانی نوێوە کە زمانحاڵی یەکێتیی نیشتمانیی کوردستانە، کۆسرەت رەسوڵ عەلی، سەرۆکی ئەنجومەنی باڵای سیاسی و بەرژەوەندی پەیامێکی ئاراستەی سەرنووسەر و سکرتاریەتی نووسین و ستافی رۆژنامەی کوردستانی نوێ کرد، پیرۆزبایی دەرچوونی رۆژنامەکەی لێکردوون.
کۆسرەت رەسوڵ عەلی لە پەیامەکەیدا دەڵێت: "بە درێژایی مێژوو لە سەرەتای دامەزراندنییەوە، یەکێتیی نیشتمانیی کوردستان بایەخێکی تایبەتی بە راگەیاندن داوە و هەمیشە بڕوای وابووە زەمینەی ئازادیی رادەربڕین فراوانتر بکرێت و لە رێگەی راگەیاندنەوە خزمەتی کۆمەڵگە بکرێت، هەر بەو ئامانجەش لە دوای راپەڕینی ساڵی 1991 لە هەولێری پایتەخت، بە هاوکاریی نووسەران و رۆشنبیران توانیمان رۆژنامەی کوردستانی نوێ دابمەزرێنین."
لە کۆتایی پەیامەکەیدا، کۆسرەت رەسوڵ عەڵی دەڵێت، "یادی دەرچوونی رۆژنامەی کوردستانی نوێ بە دەرفەت دەزانم، داوا لە سەرجەم دەزگا راگەیاندنەکان و میدیاکاران بکەم دووربکەونەوە لە بەکارهێنانی زمانی زبر و نەبنە هۆی قووڵکردنەوەی ناکۆکییەکان، لەپێناو یەکڕیزیی ناوماڵی کورد و گەیشتن بە ئامانجە بەدینەهاتووەکانی میلـلەتەکەمان و چارەسەرکردنی کێشەکان لە رێگەی گفتوگۆ و بە ئامانجی خزمەتکردنی گەلەکەمان، پیشەییانە کاربکەن."
کوردستانی نوێ، رۆژنامەی زمانحاڵی یەکێتیی نیشتمانیی کوردستانە، ژمارە سفری لە 12-1-1992دا دەرچووە، رۆژی پێنجشەممە، 12-1-2023، ژماره 8 ههزار و 836 ـی دەردەچێت و بەوەش 32 ساڵه بەردەوامە لە دەرچوون.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ