ژووری نەشتەرگەریی پیاوێکی هیندی لە هەولێر
رووداو دیجیتاڵ
پزیشکێک و پەرستارەکانی، لەکاتی نەشتەرگەری بۆ نەخۆشێک کە خەڵکی هیندستانە و لە هەولێر کار دەکات، گۆرانی هیندی لێدەدەن. پەرستارەکە دەڵێ:"بەو گۆرانییە هیندییە، ورەی کرێکارەکەمان بەرزکردەوە".
دڵدار سەدرەدین، کە وەکو پەرستار لە نەشتەرگەرییەکەدا بەشداربووە بە تۆڕی میدیایی رووداوی گوت: "نەخۆشێکی تەمەن 50 ساڵانیان گەیاندە نەخۆشخانەی سەنتەری دڵ لە هەولێر، دوای پشکنین، دەرکەوت تووشی جەڵتەی دڵ بووە و باری دەروونیشی شڵەژابوو، بۆیە بەرلەوەی نەشتەرگەرییەکەی بۆ بکەین، بیرمان لەوە کردەوە کە بە گۆرانی هیندی ورەی بەرزبکەینەوە و دڵخۆشی بکەین، بیرۆکەکەشمان سەریگرت".
کرێکارە هیندستانییەکە تەمەنی 50 ساڵانە و ناوی کۆشا هەوادار شارە، نزیکەی 10 ساڵە لە هەولێر کار دەکات.
دڵدار سەدرەدین دەڵێ: رۆژی 8ی ئایار، نەشتەرگەرییەکی سەرکەوتوویان بۆی کردووە و شەبەکە و باڵۆنی دڵیان بۆ داناوە، ئێستاش تەندروستیی جێگیرە و لە نەخۆشخانە دەرچووە.
لە بەشێکی دیکەی قسەکانیدا ئەو پەرستارە گوتی: "لەکاتی جەڵتەی دڵدا، ئاسوودەیی و نەشڵەژان کاریگەریی ئەرێنی زۆری لەسەر نەخۆش دەبێت، بۆیە ئێمەش ئەو رێگەیەمان هەڵبژارد، تاوەکو بەئاسانی لەو مەترسییە رزگاری ببێت".
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ