رووداو دیجیتاڵ
ئاگرێک لە شوێنی دەستبەسەرداگرتنی ئۆتۆمبێل کە سەر بە بەڕێوەبەرایەتی گشتیی هاتووچۆی هەولێرە کەوتەوە. گوتەبێژی بەرگریی شارستانی دەڵێت، نزیکەی 15 ماتۆڕسکیل سووتاون و نەگەیشتووەتە ئۆتۆمبێلەکان.
گۆڕەپانەکە لەسەر شەقامی هەولێر کەرکووکە و شوێنی پێشووی بەڕێوەبەرایەتی گشتیی هاتووچۆی هەولێرە؛ ئاگرەکە نزیک کاژێر 06:30ـی ئێوارەی ئەمڕۆ 11-06-2024 کەوتووەتەوە.
موقەدەم شاخەوان سەعید، گوتەبێژی بەگریی شارستانیی هەولێر بە تۆڕی میدیایی رووداوی گوت: دوای سێ خولەک لە رووداوەکە تیمیان گەیشتووەتە شوێنی رووداوەکە.
هاوکات لە شوێنی رووداوەکەوە شاخەوان سەعید لە کۆنگرەیەکی رۆژنامەڤانیدا گوتی، لە گۆڕەپانەکەدا ئۆتۆمبێل و ماتۆڕسکیل هەبوون و 15 ماتۆڕسکیل سووتاون و ئاگر بە ئۆتۆمبێلەکان نەگەیشتووە.
بە گوتەی شاخەوان سەعید، تیمەکانیان دوای گەیشتنیان، بە 11 خوولەک ئاگرەکەیان کۆنترۆڵکردووە و زیانی گیانیی نەبووە.
لەبارەی هۆکاری رووداوەکەشەوە گوتەبێژی بەرگری شارستانی هەولێر گوتی، لە گۆڕەپانەکەدا ئامێری کۆسەرە و لەحیمکردن بۆ دروستکردنی خاڵێکی چاودێریی پاسەوانی کاری پێکراوە و بووە بەهۆی ئاگرەکە و هەبوونی پووشیش لە گۆڕەپانەکەدا ئاگرەکەی فراوانتر کردووە.
بەگوێرەی بەرگریی شارستانیی هەولێر بۆ رووداو، لە پێنج مانگی سەرەتای ئەم ساڵدا 407 ئاگر لە سنوورەکە کەوتوونەتەوە، بەهۆیانەوە 19 کەس گیانیان لەدەستداوە و 58 کەسیش بریندار بوون.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ