عەبدوڵڵا ئۆجەلان دەیەوێ لەبارەی پرۆسەی چارەسەری لەگەڵ سەرۆک بازرانی و نێچێرڤان بارزانی قسە بکات

 

ئەمڕۆ چوارشەممە 11ـی حوزەیرانی 2025، ئایشەگوڵ دۆغان، گوتەبێژی دەم پارتی، دوای کۆبوونەوەی ئەنجوومەنی سەرکردایەتیی پارتەکەی، کۆنفرانسێکی رۆژنامەڤانی رێکخست و پەیامنێری تۆڕی میدیایی رووداویش ئامادە بوو. 

 

ئایشەگوڵ دۆغان باسی لە سەردانی عومەر ئۆجەلان، عەلی ئۆجەلان و کوڕەکانی عەلی ئۆجەلانی برازای عەبدوڵڵا ئۆجەلان بۆ ئیمرالی لە دووەم رۆژی جەژن کرد و رایگەیاند، دوای 26 ساڵ یەکەمجار بوو ئۆجەلان لە نزیکەوە چاوی بە منداڵ بکەوێ. 

 

ئایشەگوڵ دۆغان لەبارەی هەنگاوەکانی داهاتوویان قسەی کرد و گوتی: "پلانمان هەیە لە نزیکترین کاتدا سەردانی ئیمرالی بکەین. شاندەکەمان لە هاوسەرۆکان و ژمارەیەک ئەندامی ئەنجوومەنی سەرکردایەتیی دەم پارتی پێکدێت. بۆ باشتر تێگەیشتن لە پرۆسەکە، ئامادەیی باشتر بۆ خۆرێکخستنەوەی زیاتر و بۆ پرس و راوێژ، سەردانی بەڕێز ئۆجەلان دەکەین."

 

ئایشەگوڵ دۆغان گوتی: "ئەگەرێکی بەهێز هەیە لە داهاتوویەکی نزیکدا بەڕێز ئۆجەلان گفتوگۆی لەگەڵ نوێنەرانی لایەنە سیاسییە جیاوازەکان هەبێت. بە لەبەرچاوگرتنی قەبارە و قورسایی و سەنگینی پرۆسەکە، بەڕێز ئۆجەلان پێی وایە دیداری لەگەڵ هەریەک لە بەڕێزان مەسعود بارزانی، نێچیرڤان بارزانی، مەزڵووم عەبدی، قوباد تاڵەبانی و بافڵ تاڵەبانی سوودی دەبێت. دەزانین کار دەکات بۆ ئەنجامدانی ئەم جۆرە دیدارانە، بۆیە ویستمان رای گشتی ئاگادار بکەینەوە بەوەی ئەمە داواکاری بەڕێز ئۆجەلانە و ئێمەش پێمان وایە سوودی دەبێت. ئەنجامدانی ئەو جۆرە دیدارانە لەگەڵ سەرۆک و سەرکردەکان زۆر گرنگە و بۆ قۆناخەکانی داهاتووی پرۆسەکە پێویستە."  

 

ئایشەگوڵ دۆغان گوتی، ئەگەر دەرفەتی کاری ئازادانە بە عەبدوڵڵا ئۆجەلان بدرێت، هەموو ئەو نیگەرانییەی دوای قۆناخی خۆهەڵوەشاندنەوە و چەک دانانی پەکەکە هەیە دەڕەوێندرێنەوە؛ گوتیشی، عەبدوڵڵا ئۆجەلان "خۆی خاوەنی دەستپێشخەرییە و پێویستە رێگەی پێ بدرێت لەگەڵ هەمووان پەیوەندی هەبێت. ئەمە رێگە راستەکەیە. ئەمە یەکێکە لە چاوەڕوانییەکانمان."  

 

لەبارەی دامەزراندنی لیژنەیەکی تایبەت و پەیوەندیدار بۆ پرۆسەی چارەسەری لە پەرلەمانی تورکیا، گوتەبێژی دەم پارتی رایگەیاند: "ئەم لیژنەیە دوای دامەزراندن و کاراکردنی، وەڵامی هەموو پرسیارەکان دەداتەوە و هەموو نیگەرانییەکان دەڕەوێنێتەوە. ئەو لیژنەیە نەخشەڕێگە و ئاسۆی قۆناخەکە روون و دیاری دەکات". 

 

ئایشەگوڵ دۆغان باسی لەوەشکرد: "هەرچەندە لە رۆژانی داهاتوودا پەرلەمانی تورکیا دەچێتە پشووی فەرمی، بەڵام ئەرکی سەرشانی سەرۆکی پەرلەمانە پێش دەستپێکردنی پشووەکە دەستپێشخەری بکات بۆ کۆکردنەوەی سەرۆک و سەرکردەی پارتە سیاسییەکان لەپێناو پێکهێنانی لیژنە و دیاریکردنی میکانیزمی کارکردنی و داڕشتنی کارنامەی لیژنەکە، چونکە ئەمە بۆ چارەسەرکردنی کێشەی کورد و بۆ دیموکراسیبوونی تورکیایە". 

 

هەر سەبارەت بە کەیسی لیژنە پەرلەمانییەکە، گوتەبێژی دەم پارتی رایگەیاند، سەردانی لایەنە سیاسییەکانیان کرد و گوتی: "ئۆپۆزسیۆن چاوەڕوانی هەیە دەیانەوێ بەشێوەیەکی کارا لە پرۆسەی چارەسەریدا رۆڵ بگێڕن. بۆ ئەمەش پێویستیان بە زانیارییە لە کۆی رووداو و پێشهاتەکان. داوای شەفافییەت دەکەن لەم پرۆسەیەدا".