ئەندامێکی شاندی کوردی: داوای ناناوەندی لە شام دەکەین

 

 

نەسرەدین ئیبراهیم ئاماژەی بەوە کرد، وەک شاندی هاوبەشی کوردی لە داهاتوویەکی نزیکدا کۆبوونەوەی خۆیان دەکەن و دواتریش داوای کۆبوونەوە لە حکومەتی شام دەکەن و کەی وەڵامیان درایەوە، دەچنە شام.

 

شاندە کوردییەکە دوای "کۆنفرانسی یەکڕیزی و یەکهەڵوێستیی کوردی رۆژئاوای کوردستان" لە 4ی حوزەیران پێکهێنرا. لە 9 کەس پێکهاتووە، نەسرەدین ئیبراهیم لەبارەی ژمارەی ئەندامانی شاندی کوردییەوە روونیکردەوە، کە بۆ فراوانکردنی شاندەکە پێشنیاز هەن و گوتی: "پێش ئەوەی بچینە شام کۆبوونەوەیەکی دیکەمان دەبێت. رەنگە ژنێکی ئەکادیمیی سەربەخۆ لە هەرێمی عەفرین ببێتە ئەندامی شاندەکە، بەڵام تاوەکو ئێستا ناوی دیاری نەکراوە". گوتی "ئێمە هیوادارین گەلەکەمان و هەموو رۆشنبیر و سیاسەتمەدارێک پاڵپشتیی شاندەکەمان بکەن."

 

ئیبراهیم ئاماژەی بەوەش کرد، لە کۆبوونەوەی داهاتوویاندا چەند لیژنەیەک پێکدەهێندرێن و گوتەبێژێکیش بۆ شاندەکەیان دیاری دەکرێت.

 

ئەندامەکەی شاندی هاوبەشی کوردی ئاشکرای کرد، دانوستاندنەکانیان لەگەڵ شام، لەسەر بنەمای ئەو خاڵانە دەبێت، کە لە کۆنفرانسی یەکڕیزی و یەکهەڵوێستیی کوردی رۆژئاوای کوردستان لەسەری رێککەوتوون.

 

نەسرەدین ئیبراهیم لەبارەی داواکارییەکانی کورد کە ئاراستەی شامی دەکەن، رایگەیاند ئەوان داوای سووریایەکی ناناوەندیی دیموکراتی و فرەلایەن دەکەن، کە مافی کورد و پێکهاتەکانی دیکەی تێدا پارێزراو بێت و گوتی: "ئەو سیستمی ناناوەندییەی کە ئێمە دەمانەوێت، دەبێت بەگوێرەی بارودۆخی سووریا و پێکهاتەکانی بێت. گرنگ ئەوەیە ئەو هەرێمە ناناوەندییانە خۆیان خۆیان بەڕێوەببەن و خۆیان بڕیارەکانیان بدەن."

 

گوتیشی "ئامانجمان ئەوەیە ناوچە کوردییەکان لە رووی سیاسی و جوگرافییەوە یەک بن و ئێمە بۆ ئەوە کار دەکەین."

 

بە گوتەی نەسرەدین ئیبراهیم، "سیستمی ناناوەندی سووریا پارچە ناکات، بەپێچەوانەوە یەکپارچەیی سووریا بەهێز دەکات"

 

رێکەوتی 8ی کانوونی یەکەمی 2024، دوای هێرشێکی خێرای هێزەکانی ئۆپۆزسیۆن و کۆنترۆڵکردنی دیمەشقی پایتەخت، رژێمی ئەسەد کۆتایی پێهات.

 

ئێستا ئەحمەد شەرع سەرۆکی سووریایە و کورد دەیەوێ لە سووریای دوای ئەسەد مافەکانی دیاربکرێ، پێکهێنانی ئەو شاندە بۆ مەبەستی دانوستاندنە لەگەڵ دەسەڵاتدارانی سووریا.