هەڵەیەک روویدا! دووبارە هەوڵبدە
چەند رۆژێکە ئێران هێڵی ئینتەرنێت و پەیوەندیکردنی بڕیوە.
رووداو دیجیتاڵ
بە کۆڵێک هیوا و نیگەرانییەوە، کاری ئەم رۆژانەی بێهنام بووە بە پەیوەندیکردن بە بنەماڵەکەی لە شاری ئیلام؛ شارێک کە چەقی گرژییەکانی رۆژهەڵاتی کوردستان و بڵێسەی خۆپێشاندانەکانی ئەم دواییەی لێ هەڵگیرساوە.
گلارای هاوژینی بێهنام خەڵکی هەمان شارە، ئەویش بەردەوام چاوی لەسەر زانیاریی نوێی خۆپێشاندانەکانی شارەکەیان و رۆژهەڵاتی کوردستانە.
هەموو هەوڵەکانیان بێسوودە، نە بێهنام زەنگی تەلەفۆنی بە بنەماڵەکەی دەگات و نە گلاراش هەواڵی نوێ لە کەسوکار و دۆخی شارەکەی دەزانێت، چونکە 5 رۆژ دەبێت حکومەت ئینتەرنێت و هەموو رێگەیەکی پەیوەندیکردنی لەسەر وڵات بڕیوە.
بێهنام جەمالی دەڵێت: "لەگەڵ خێزانەکەم، دایک و باوکم پەیوەندیم هەبوو، لە دۆخیانم دەپرسی بزانم چۆنن، هەروەها لەگەڵ دۆست و برادەریش قسەم دەکرد. رۆژی چوارشەممە بوو؛ کەلوپەلی خۆراکیش نەماوە لە ئێران، یانی بڕوا بکە رۆن و برنج و ئێستا هیچ شتێک نەماوە."
گلارا مستەفاوی، هاوژینی بێهنامە و باس لەوە دەکات: "ئێمە هیچ حەوانەوەیەک و هیچمان نییە، هەموو بیرمان بەس لەسەر ئەوەیە کە بزانین چی روویدا و چی بووە."
7 ساڵ دووری لە دایک و باوک و ئازیزانی، بەقەد ئەم 5 رۆژەی بێهەواڵبوون لە کەسوکارەکەی بەهۆی پچڕانی ئینتەرنێت بۆ یەزدان سەخت نەبووە. ئەم گەنجە خەڵکی خورماوەی لوڕستانە.
یەزدانی فەرەهمەند ئاماژە بەوە دەدات: "هیچ پەیوەندییەکمان لەگەڵ ئێران و رۆژهەڵاتی کوردستان نەماوە، نە لە رێگەی هێڵەکانەوە (خەت) نە لە رێگەی سیمکارتەوە. هەموو رێگەکانی پەیوەندیکردن بە خێزانەکەمان و کەسوکارمان لە رۆژهەڵاتی کوردستان داخستووە، ناهێڵن ئاگامان لەوە بێت کەسە نزیکەکانمان کوژراون یان بریندارن."
خۆپێشاندانەکان لە ئێران، رۆژی 28-12-2025 بەهۆی گرانی و خراپیی دۆخی بژێوی، بە مانگرتنی کاسبکاران لە تاران دەستی پێ کرد و دواتر تەواوی پارێزگاکانی ئێران و رۆژهەڵاتی کوردستانی گرتەوە.
رێکخراوەکانی مافی مرۆڤ دەڵێن تا ئێستا 544 خۆپێشاندەر کوژراون و نزیکەی 11 هەزار کەس دەستگیرکراون.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ