کوردستان
ساتی گەیشتنی محەممەدجەعفەر قائیمپەنا، جێگری سەرۆککۆماری ئێران بۆ کاروباری جێبەجێکردن و ئەسکەندەر موئمینی، وەزیری ناوخۆی ئێران بۆ کرماشان
رووداو دیجیتاڵ
جێگری سەرۆککۆماری ئێران بۆ کاروباری جێبەجێکردن و وەزیری ناوخۆی ئێران، ئەمڕۆ بە سەردانێک گەیشتنە پارێزگای کرماشانی رۆژهەڵاتی کوردستان.
ئەمڕۆ سێشەممە 12ی ئابی 2025 محەممەدجەعفەر قائیمپەنا، جێگری سەرۆککۆماری ئێران بۆ کاروباری جێبەجێکردن و ئەسکەندەر موئمینی، وەزیری ناوخۆی ئێران بە سەردانێکی رانەگەیێندراو گەیشتنە پارێزگای کرماشان.
محەممەدجەعفەر قائیمپەنا و ئەسکەندەر موئمینی لە فڕۆکەخانەی نێودەوڵەتیی کرماشان لە لایەن مەنووچێهر حەبیبی، پارێزگار و ژمارەیەک لە بەرپرسانی دیکەی کرماشانەوە پێشوازییان لێکرا.
بەسەرکردنەوەی کاروانەکانی رێوڕەسمی چلەی ئیمام حوسێن (ئەربەعین) لەسەر رێگەی کرماشان بۆ دەروازەی سنووریی خوسرەوی، ئامادەبوون لە دەروازە سنوورییەکە و چاودێریکردنی مەیدانیی دۆخی هاتووچۆی زیارەتکاران و چۆنیەتی پێشکەشکردنی خزمەتگوزارییەکان، هەروەها بەسەرکردنەوەی چەندین پرۆژەی بەرهەمهێنان و ژینگەپارێزی، لە بەرنامەکانی سەردانی جێگری سەرۆککۆمار و وەزیری ناوخۆی ئێرانن بۆ پارێزگای کرماشان.
محەممەدجەعفەر قائیمپەنا، جێگری سەرۆککۆماری ئێران بۆ کاروباری جێبەجێکردن دوای گەیشتنی بە کرماشان رایگەیاند، پێویستە ژێرخان و رێگەکانی هاتووچۆی زیارەتکاران بەشێوەیەک ئامادە بکرێن کە گەشتەکەیان بە ئاسانی بکەن و کەمترین نیگەرانیان هەبێت.
قائیمپەنا هەروەها گوتی، پێویستە هەموو دەزگە بەرپرس و پەیوەندیدارەکان هاوئاهەنگ و هاوکار بن بۆ دابینکردنی هەلومەرجێک بۆ ئەوەی زیارەتکارانی رێوڕەسمی چڵە بە ئارامی و ئاسانی سوود لە خزمەتگوزارییەکان وەربگرن و گەشتەکەیان بە باشترین شێوە ئەنجام بدەن.
ئەم ساڵ شەشەمین ساڵە کە زیارەتکارانی شیعە بۆ بەشداریکردن لە رێوڕەسمەکانی چلەی ئیمام حوسێن ، دەروازەی سنووریی خوسرەوی لە پارێزگای کرماشان بەکاردەهێنن.
بەپێی وەزارەتی ناوخۆی ئێران، پار نزیکەی یەک ملیۆن زیارەتکاری شیعە بۆ رێوڕەسمەکە لە رێگەی دەروازەی سنووریی خوسرەوییەوە هاتووچۆیان کردووە و پێشبینی دەکرێت، ئەم ساڵ ژمارەکە زیاتر بێت.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ