وەزارەتی کارەبا: رێگریکردن لە تیمەکانی بەستنی پێوەری زیرەک لە پێنجوێن مەرامی تایبەتی لە پشت بووە

 

ئەمڕۆ یەکشەممە 13ی شوباتی 2022، لە قەزای پێنجوێنی سەر بە پارێزگای سلێمانی ژمارەی کەس خۆپیشاندانیان کرد و بەپێی گرتە ڤیدیۆییەکان کە لە تۆڕە کۆمەڵایەتییەکان بڵاوبوونەتەوە تێیدا هێرشدەکرێتە سەر ئۆتۆمبێلی وەزارەتی کارەبا و پێوەری زیرەک دەشکێنرێت.

 

وەزارەتی کارەبای حکومەتی هەرێمی کوردستان لەو بارەوە روونکردنەوەیەکی بڵاوکردەوە و رایگەیاند،"لە پێنجوێن، لە لایەن هەندێ کەسی نابەرپرسەوە، بە پاساوی کەمبوونەوەی کارەبا، رێگری لە تیمەکانی کارەبا بۆ بەستنی پێوەری زیرەک کراوە، هەمووان دەزانن کە لە پێنجوێن بەهۆی بەفر و سەرمای سەختی ناوچەکە، کاتەکانی پێدانی کارەبا لە هەموو ناوچەکانی دیکەی هەرێم زیاتر بووە".

 

هەروەها لە روونکردنەوەکەدا هاتووە، "رێگری کردن لە تیمەکانی کارەبا بۆ بەستنی پێوەری زیرەک، هاندان و بۆ مەرامێکی تایبەتی بووە و هیچ پەیوەندییەکی بە پرۆژەی پێوەری زیرەکەوە نییە".

 

سەرەتای مانگی کانوونی دووەمی ئەمساڵ لەبەشێک لە تۆڕەکانی کۆمەڵایەتی هەندێک کەس داوای لێکردنەوەی پێوەری زیرەک و پێوەری ئاو لەلایەن هەندێک کەسەوە کرا، دواتر لە 8ی کانوونی یەکەمی 2022، وەزارەتی کارەبای هەرێمی کوردستان روونکردنەوەیەکی بڵاوکردەوە و رایگەیاند، "بەلاڕێدابردنی رای گشتی بە ئەنقەست بێت، یان لە نەزانینەوە بێت، دەرخەری ئەو راستییەیە کە پاڵنەرانی ئەم بابەتە، هێشتا لە کار و ئەرکی پڕۆژەی پێوەری زیرەک تێنەگەیشتوون و نازانن ئەرکی ئەم پێوەرە لە کەرتی کارەبادا لە پاڵ بەشەکانی بەرهەمهێنان گواستنەوە و دابەشکردن چییە." 

 

پێوەری زیرەک، یەکێکە لەپڕۆژەکانی وەزارەتی کارەبا لەساڵی 2020ەوە دەستیپێکردووە، وەزارەتی کارەبا دەڵێت لەرێگەی پڕۆژەکەوە کارەبا کۆنتڕۆڵ دەکات و رێگە لەبەهەدەردان دەگرێت و سوودی دیکەشی هەیە.