رووداو دیجیتاڵ
وەزارەتی پەروەردەی هەرێمی کوردستان رێنماییەکانی تاقیکردنەوەکانی پۆلی 12ـی ئامادەیی بڵاوکردەوە و دەڵێت، "دەستدرێژیکردن بۆ سەر مامۆستا لەکاتی جێبەجێکردنی ئەرکەکەی، بە دەستدرێژیکردن سەر فەرمانبەری دەوڵەت دادەنرێت".
وەزارەتی پەروەردە دەڵێت، "پێویستە سەرپەرشتیار، بەڕێوەبەر و یاریدەدر چاودێریی هۆڵەکانی خوێندن بکەن و کەشێکی گونجاو بۆ قوتابییان و خویندکاران دابین بکەن".
لە خاڵێکی دیکەی رێنماییەکاندا هاتووە، "بردنە ژوورەوە هەموو جۆرە ئامێرێکی ئەلیکترۆنی بۆ ناو ناوەندەکانی تاقیکردنەوە قەدەخەیە".
تاقیکردنەوەکانی خولی یەکەمی پۆلی 12ـی ئامادەیی رۆژی یەکشەممە، 23ـی حوزەیران دەستپێدەکەن و رۆژی چوارشەممە، 17ـی تەممووز دوایین تاقیکردنەوە دەبێت.
وەزارەتی پەروەردە نۆ رێنمایی بڵاوکردوونەتەوە کە هاوپێچەکەیان لە خوارەوە دانراوە:
یەکەم: پێویستە کەشێکی گونجاو بۆ قوتابیان و خوێندکاران فەراهەم بکرێت.
دووەم: دەستدرێژیکردن بۆ سەر مامۆستا لەکاتی جێبەجێکردنی ئەرکەکەی، یاخود بەهۆی وەزیفەکەیەوە، بەباری تووندکاری سزی دەستدرێژیکردن بۆ سەر فەرمانبەری دەوڵەت دادەنرێت.
سێیەم: بردنە ژوورەوەی هەموو جۆرە ئامێرێکی ئەلیکترۆنی بۆ ناو ناوەندەکانی تاقیکردنەوە قەدەخەیە.
چوارەم: نابێت بەهیچ جۆرێک موبایلی زیرەک بەرنە ناو ناوەندی تاقیکردنەوە و هۆڵەکانی تاقیکردنەوە.
پێنجەم: پرسیاری بابەتەکانی تاقیکردنەوە لەلایەن مامۆستای چاودێر لە قوتابیان وەردەگرێنەوە و پێویستە بەڕێوەبەری هۆڵ و یاریدەدەر لەوە دڵنیاببنەوە کە پرسیارەکان و پەڕەی سۆما وەردەگرنەوە.
شەشەم: پشکنین بۆ هەموو قوتابیان و خوێندکاران ئەنجام دەدرێت پێش چوونە هۆڵی تاقیکردنەوە؛ هەموو ئامێرێکی ئەلیکترۆنی و زیرەک رێگەپێنەدراوە.
حەوتەم: هیچ کەسێک مافی نییە پرسیارەکان وێنە بگرێت و لە تۆڕە کۆمەڵایەتییەکان بڵاویان بکاتەوە.
هەشتەم: مامۆستایان و سەرپەرشتاران و فەرمانبەرانی دیکەش مافیان نییە کە پرسیارەکانی پۆلی 12 پاش تاقیکردنەوەکان بڵاوبکەنەوە و وەڵامیان دیاریبکەن. وەڵامەکان لەلایەن لیژنەی باڵای تاقیکردنەوە گشتییەکانەوە پاش تەواوبوونی تاقیکردنەوەکان دیاری دەکرێن.
نۆیەم: رووماڵی راگەیاندنەکان؛ بەڕێوەبەری گشتیی پەروەدەی پارێزگا یان ئیدارەی سەربەخۆ دەسەڵاتی هەیە کە یەک ناوندی تاقیکردنەوە دیاری بکات بۆ ئەوەی لێدوان بۆ رۆژنامەنووسان بدات.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ