رووداو دیجیتاڵ
دوای ئاڵۆزییەکانی ناوچەکە و راگرتنی گەشتە ئاسمانییەکان لە عێراق و هەرێمی کوردستان، بەڕێوەبەرایەتیی حەج و عومرەی هەرێمی کوردستان رایگەیاند، بڕیار درا هەموو حاجییان بە رێگەی وشکانی بگەڕێندرێنەوە.
کاروان ستوونی، گوتەبێژی بەڕێوەبەرایەتیی گشتیی حەج و عومرەی هەرێمی کوردستان، ئەمڕۆ هەینی بە تۆڕی میدیایی رووداوی گوت: "دوای هاوئاهەنگی لەگەڵ حەج و عومرەی عێراق، بڕیار درا ئەو حاجییانەی بە فڕۆکە گەشتیان کردووە لە رێگەی وشکانییەوە بگەڕێندرێنەوە".
ئەم ساڵ سێ هەزار و 490 هاونیشتمانی بۆ رێوڕەسمەکانی حەج بە فڕۆکە چوونە سعودیە. بڕیاربوو سبەی 14ـی حوزەیران، گەڕانەوەیان دەستپێبکات و 20ـی مانگ کۆتا گەشتیان بگاتەوە هەرێمی کوردستان، بەڵام بەهۆی ئاڵۆزییەکانی ناوچەکەوە، ئەمڕۆ ئاسمانی عێراق بە تەواوی بە رووی فڕۆکەدا داخرا.
کاروان ستوونی گوتی: "رێککەوتن لەگەڵ کۆمپانیا سعودیەکان کراوە و بە پاس تاوەکو دەروازەی عەرعەر دەیانهێنن و لەوێشەوە بە پاسی دیکە دەگەڕێندرێنەوە هەرێمی کوردستان".
بە گوتەی ستوونی، "ئەو هاونیشتمانیانە بە فڕۆکە چوونەتە حەج و بە رێگەی وشکانی دەهێندرێنەوە، گەشتەکانیان لە ئەمشەوەوە دەستپێدەکات".
بە گوتەی ستوونی، پێشتریش بەهۆی رووداوی جیاوە لە سعودیەوە گەشتی ئاسمانی گۆڕدراوە بۆ گەشتی وشکانی. گوتیشی: "ئێستا دۆخەکە ئارامە و پێویست ناکات کەسوکاری حاجییان هیچ دڵەڕاوکێکیان هەبێت".
ئەم ساڵ هەزار و 667 هاونیشتمانی بە رێگەی وشکانی چووبوونە حەج.
دوێنێ یەکەم کاروانی حاجییان لە رێگەی وشکانییەوە کە خەڵکی پارێزگاکانی سلێمانی و هەڵەبجە بوون و ژمارەیان 714 کەسە بەرەو هەرێمی کوردستان بەڕێکەوتن و بڕیارە ئەمڕۆ بگەنەوە هەرێمی کوردستان.
گوتەبێژی حەج و عومرە گوتیشی، حاجییانی دیکەی پارێزگاکانی هەولێر و دهۆک لە رێگەی وشکانییەوە چووبوون، لە هەمان رێگەوە بەڕێکەوتوون و سبەی دەگەنەوە هەرێمی کوردستان.
ئەوە لەکاتێکدایە، ئەمڕۆ دەستەی حەج و عومرەی عێراق رایگەیاند، بڕیاری داوە سەرجەم حاجییە عێراقییەکان بە رێگەی وشکانی بگەڕێنێتەوە بۆ وڵات.
دەستەکە دەڵێت: "بەهۆی ئەو بارودۆخە نەخوازراوەی لە ناوچەکە هاتووەتە ئاراوە و راگرتنی گەشتە ئاسمانییەکان بۆ عێراق، سەرجەم حاجییەکان بە رێگەی وشکانی دەگەڕێندرێنەوە بۆ وڵات."
16ـی ئایار، یەکەم کاروانی زیارەتکارانی رێوڕەسمەکانی حەج لە هەرێمی کوردستانەوە لە رێگەی وشکانییەوە بەرەو سعودیە بەڕێکەوتن و یەکەم گەشتی ئاسمانییش 19ـی هەمان مانگ بەرەو ئەو وڵاتە بەڕێکەوت.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ