کۆنفرانسی رۆژنامەڤانیی سەعدی ئەحمەد پیرە، ئەندامی مەکتەبی سیاسیی یەکێتی
رووداو دیجیتاڵ
ئەندامێکی مەکتەبی سیاسیی یەکێتیی نیشتمانیی کوردستان دەڵێت، دەبێت ئەو بۆشاییە دەستوورییەی هەیە کۆتایی پێبێت، هاوکات لەبارەی پەیوەندییەکانیان لەگەڵ پارتی پێیوایە، "گرژی و ئاڵۆزیی لەنێوان پارتی و یەکێتیدا نییە، ئێستا پەیوەندیمان بەردەوامە و گفتوگۆ هەیە."
رۆژی یەکشەممە 13ـی ئابی 2023، سەعدی ئەحمەد پیرە، ئەندامی مەکتەبی سیاسیی یەکێتیی نیشتمانیی کوردستان لە کۆنفرانسێکی رۆژنامەڤانیدا رایگەیاند، "پێویستە کێشەکان بە گفتوگۆی فەرمی و چڕ چارەسەر بکرێن و لە ژوورە داخراوەکان باسی هەموو ئەو بابەتانە بکەن کە هەڕەشەیە بۆ سەر هەرێمی کوردستان."
سەعدی ئەحمەد پیرە گوتی، "ئێستا ئێمە هەڕەشەکانمان لەبیر کردووە و خەریکی دژایەتیکردنی یەکترین، دەبێت بەرپرسانی هەردوولامان گوێ لەو قسانە نەگرن و خەریکی گفتوگۆکردن بن بۆ چارەسەری کێشەکان."
ئەو ئەندامەی مەکتەبی سیاسیی یەکێتی پێیوایە، "گرژی و ئاڵۆزی لەنێوان پارتی و یەکێتیدا نییە" و دەڵێت؛ "یەکێک لەخۆیەوە قسە دەکات، مەرج نییە قسەکانی بۆچوونی هەموو پارتی بێت، ئێستا پەیوەندیمان لەگەڵ پارتی بەردەوامە و گفتوگۆ هەیە."
لەبارەی هەڵبژاردنی پەرلەمانی کوردستان، سەعدی ئەحمەد پیرە گوتی، "هەڵبژاردنی پەرلەمان گرنگە و دەبێت ئەو بۆشاییە دەستوورییەی هەیە کۆتایی پێبێت."
رۆژی 3ـی ئابی 2023، سەرۆکی هەرێمی کوردستان بڕیاری دا 25ی شوباتی 2024 هەڵبژاردنی پەرلەمانی کوردستان بەڕێوەبچێت.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ