رووداو دیجیتاڵ
وەزارەتی سامانە سرووشتییەکانی هەرێمی کوردستان، لە روونکردنەوەیەکدا ئەو دەنگۆیانە رەتدەکاتەوە، کە باس لە قەیرانی سووتەمەنی لە هەرێمی کوردستان دەکەن و دەڵێت: "قەیرانی سووتەمەنیمان نییە و نابێت."
روونکردنەوەکەی وەزارەتی سامانە سرووشتییەکان، شەوی دووشەممە لە پەڕەی فەرمیی وەزارەتەکە لە فەیسبووک بڵاوکراوەتەوە، ئەمەش دوای هەندێک كەناڵ و پەیجەکانی سۆشیال میدیا هەواڵێکیان لەسەر زاری وەزیری سامانە سروشتییەکان بڵاوکردەوە، گوایە گوتوویەتی، هەرێمی كوردستان رووبەرووی قەیرانی سووتەمەنی بووەتەوە.
لە روونکردنەوەکەدا هاتووە: "هەندێ كەناڵ و پەیجەکانی سۆشیال میدیا، پرسی راستگۆیی و پیشەیی بۆ بانگەشەی راگەیاندن بەكاردەهێنن و دەیانەوێت بە بڵاوکردنەوەی چەواشەكاری، بیروڕای گشتی بەلاڕێدا ببەن."
وەزارەتەکە ئاماژەی بە دیدارێکی كەمال محەممەد ساڵح، وەزیری سامانە سروشتییەكان بە وەکالەت داوە، کە کەناڵێک بەبێ ئەوەی ئاماژە بە سەرچاوەکەی بدات، باسیان لە "قەیرانی سووتەمەنی لە هەرێمی کوردستان" کردووە.
وەزارەتی سامانە سرووشتییەکانی هەرێمی کوردستان دەڵێت: "وەزیری سامانە سرووشتییەكان تەنیا باسی ئەوەی كردووە كە پشكی هەرێم بۆ ناوخۆ كەمە و وەزارەت هەموو هەوڵێك دەدات بۆ ئەوەی بەنزین و سووتەمەنیی زیاتر دابین بكات و بەهیچ شێوەیەك باسی قەیرانی سووتەمەنی نەكردووە، كەچی ئەوان باسیان لە قەیرانی بەنزین و سووتەمەنی کردووە.
بەپێی ئەو رێککەوتنەی لە نێوان حکومەتی عێراق و هەرێمی کوردستان کراوە و 27ی ئەیلوولی 2025 چووە بواری جێبەجێکردنەوە، لەو نەوتەی لە هەرێمی کوردستان بەرهەمدەهێندرێت، 50 هەزار بەرمیلی بۆ بەکارهێنانی ناوخۆ دەبێت.
وەزارەتی سامانە سرووشتییەکان جەخت لەوە دەکاتەوە، کە: "بەهیچ شێوەیەك هەرێمی كوردستان رووبەڕووی قەیرانی بەنزین و سووتەمەنی نەبووەتەوە و نابێتەوە."
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ