رووداو دیجیتاڵ
وەزارەتی بەرگریی تورکیا رایگەیاند، 25 پێگەی پارتی کرێکارانی کوردستان - پەکەکەی لە هەرێمی کوردستان بۆردوومان کردووە.
بەگوێرەی راگەیێندراوەکە، فڕۆکە و درۆنە جەنگییەکانی سەر بە فەرماندەیی هێزە ئاسمانییەکان بە هاوئاهەنگیی دەزگای هەواڵگری، کاژێر 21:00ی رۆژی 13ی کانوونی دووەم 25 پێگەی پەکەکەیان لە هەرێمی کوردستان بۆردوومان کردووە.
وەزارەتی بەرگریی تورکیا دەڵێت، بە مەبەستی لەنێوبردنی ئەندامانی پەکەکە، نەهێشتنی ئەو هێرش و هەڕەشانەی لە هەرێمی کوردستانەوە دەکرێنە سەر هێزە ئەمنییەکان و بۆ "پاراستنی سنوورەکان"یان، هێرشە ئاسمانییەکان بۆسەر ناوچەکانی مەتین، خواکوڕک و قەندیل لە هەرێمی کوردستان ئەنجامدران.
ئەم راگەیێندراوە لە کاتێکدایە، رۆژی 13ی مانگ، وەزارەتی بەرگریی تورکیا کوژرانی نۆ سەرباز و برینداربوونی چوار سەربازی دیکەی لە ناوچەی زاپ لە سنووری پارێزگای دهۆک لە هەرێمی کوردستان لە ئەنجامی رووبەڕووبوونەوەی لەگەڵ گەریلاکانی پەکەکە راگەیاند.
سوپای تورکیا ئاماژەی بەوەش کرد، لە شەڕ و پێکدادانەکەدا 57 گەریلا گیانیان لەدەستداوە.
هەمان رۆژ، ناوەندی چاپەمەنی و راگەیاندنی هەپەگە بڵاویکردەوە، گەریلاکان لە سێ قۆڵەوە هێرشەکەیان کردووەتە سەر بنکەیەکی سەربازیی هێزەکانی تورکیا لە ناوچەی زاپ و بەو هۆیەوە 9 سەرباز کوژراون و لانیکەم 17 سەربازی دیکەش برینداربوون.
ئەم شەڕ و پێکدادانە لە چوارچێوەی ئۆپەراسیۆنێکدایە تورکیا ناوی ناوە چنگ - قوفڵ، کە بەرەبەیانی رۆژی 18ی نیسانی 2022 لە ناوچەکانی ئاڤاشین، مەتین و زاپ لە خاکی هەرێمی کوردستان بۆ سەر پێگەکانی پەکەکە دەستیپێکرد.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ