کۆمەڵی دادگەری: چەندین جۆر ئاڵا لە کەرکووک دەبینرێن، تەنیا ئاڵای کوردستان نەبێت

 

رۆژی سێشەممە 14-3-2023، مەڵبەندی کەرکووکی کۆمەڵی دادگەریی کوردستان راگەیێندراوێکی بڵاوکردەوە و تێیدا دەڵێت: "وەک لای هەمووان ئاشکرایە 32 ساڵ لەمەوبەر لە کاتێکدا جامی توڕەیی جەماوەر لەئاستی ستەم و دڕندەیی رژێمی بەعس پڕبوو و رژانە سەرشەقامەکان و بە خوێنی گەشی هەزاران گەنج راپەڕینیان بەرپاکرد و هەرەمی بە ستەم دروستکراوی بەعسیان رووخاند و ئاهەنگی سەرکەوتنیان لەسەر قەڵای شاری کەرکووک گێڕا، بەڵام دەسەڵاتی سیاسیی کورد بێ خوێندنەوەی واقیعیانە و بێ گوێگرتن بۆ دڵسۆزان بەبڕیارێکی دیراسەنەکراو لە 51٪ـی خاکی کوردستانی لە دەستدا." 

 

مەڵبەندی کەرکووکی کۆمەڵی دادگەری رەخنە لە سیاسەتی دەسەڵاتی ئێستای شارەکە و حکومەتی عێراق لە دوای 16ی ئۆکتۆبەرەوە دەگرێت و دەڵێت: "وەک بینیمان رێگەیان بە یادی رۆژی پۆشاکی کوردی نەدا لە خوێندنگەکاندا و بۆ دەربڕینی یادی هەڵەبجە و راپەڕین و نەورۆز دەبێت بە ئیزن و لە کاتێکی کورتی دیاریکراو بەبێ ئاڵای کوردستان یاد بکرێتەوە، لەکاتێکدا جۆرەها دروشم و ئاڵا لە شاری کەرکوک بە ئاشکرا دەبینرێن تەنها ئاڵای کوردستان نەبێت." 

 

لە راگەیێندراوەکەدا کۆمەڵی دادگەری رەخنە لە یەکێتی و پارتیش دەگرێت و رایدەگەیێنێت: "هەردوو حیزبی دەسەڵاتیش بۆنە و یادەکان بە حیزبی دەکەن و لە دوو شوێنی جیاواز یادی دەکەنەوە، لەبەر ئەوە ئێمە لە مەڵبەندی کەرکووکی کۆمەڵی دادگەری بەشداری لەهیچ بۆنە و مەراسیمێکی نەتەوەیی بە حیزبیکراو ناکەین و روودەکەینە بەرپرسانی حکومەتی خۆجێیی شاری کەرکووک و دەڵێین، سیاسەتی پەراوێزخستن بۆ هیچ کەس و لایەنێک نەچووە و ناچێتە سەر و خزمەت بە برایەتی پێکهاتەکان ناکات و نائارامی دروست دەکات." 

 

مەڵبەندەکەی کۆمەڵی دادگەری دەشڵێت: "کورد و زمانی و کولتووری لە دەستووردا جێگیر کراون. دەبێت کورد ئازادانە پیادەی مافی خۆی بکات و بێ هیچ رێگری و سانسۆرێک و بەشێوەیەکی مەدەنیانە و بێ ئاژاوەگێڕی ئەو یادانە بکاتەوە." 

 

لە کۆتایی راگەیێندراوەکەیدا کۆمەڵی دادگەری کۆمەڵێک رەخنەی دیکەش دەگرێت و دەڵێت: "هەروەها بەهەردوو حیزبی دەسەڵاتدار دەڵێین، نە نموونەیەکی جوانی حوکمڕانیتان پێشکێشکرد و نە پارێزگاریتان لە دەسکەوتەکانی راپەڕین کرد. لە ماوەی 32 ساڵی حوکمڕانیتان حیزبیانە هەڵسوکەوتتان کرد بۆ بەرژەوەندی تەسکی حیزبایەتی هەوڵتاندا و بەرژەوەندی گشتیتان کردە قوربانی داهات و پلە و پۆست و گەندەڵیتان کرد و ئەم رۆژەتان هێنایە ئاراوە."