رووداو دیجیتاڵ
بەڕێوەبەری بەڕێوەبەرایەتیی گشتیی شارەوانییەکانی هەولێر رایگەیاند، لە هەنگاوی کۆتاییدان و لە بنەسڵاوە، کەسنەزان و دارەتوو زیاتر لە 14 هەزار پارچە زەوی دابەش دەکەن.
مەریوان حاکم هادی، بەڕێوەبەری گشتیی شارەوانییەکانی هەولێر، لەبارەی کاتی دابەشکردنی زەوییەکان، ئەمڕۆ سێشەممە بە رووداوی راگەیاند: "ئەگەر لەم هەفتەیە دابەش نەکرێت، بێگومان هەفتەی داهاتوو دابەش دەکرێن".
ئەو زەوییانە بەگوێرەی شوێنی دانیشتنی فەرمانبەرانی ئەو سێ ناوچەیەی پارێزگای هەولێر دابەش دەکرێن. وەکو مەریوان حاکم هادی ئاماژەی پێکرد، هەرکەسە و لە سنووری خۆی زەوی وەردەگرێت.
بەگوێرەی ئاماری بەڕێوەبەرایەتیی گشتیی شارەوانییەکان، جگە لە شارەوانی هەولێر، لە شارەوانییەکانی سنوورەکە ئەم ساڵ تاوەکو ئێستا نزیکەی 17 هەزار پارچە زەوی دابەش کراوە.
دابەشکردنی زەوی لە چوارچێوەی بڕیارێکی 27ـی ئاداری 2024 ـی ئەنجوومەنی وەزیرانی هەرێمی کوردستانە، کە بڕیاریان دا زەوی بدرێتە ئەو فەرمانبەر و خانەنشینانەی سوودمەند نەبوون.
رووبەری ئەو زەوییەی بۆ هەر فەرمانبەر یان پێشمەرگە و خانەنشینێک تەرخان دەکرێت 200 مەتر دووجایە و دابەشکردنەکەش بە تیروپشک و بە گوێرەی سیستمی خاڵبەندی دەبێ، تاوەکو ئەمڕۆ لە بەشێکی شارەکان دابەشکراوە و دابەشکردنیش بەردەوامە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ