رووداو دیجیتاڵ
دوای کۆتاییهاتنی ئەرکەکانی نێردەی نەتەوە یەکگرتووەکان بۆ هاوکاریی عێراق (یونامی)، ئەمڕۆ بە شێوەیەکی فەرمی بارەگای نێردەکە لە هەولێر رادەستی حکومەتی هەرێمی کوردستان کرایەوە.
رۆژی یەکشەممە، 15-03-2026، سەفین دزەیی، بەرپرسی فەرمانگەی پەیوەندییەکانی دەرەوەی هەرێمی کوردستان پێشوازی لە غولام ئیسحاقزای، رێکخەری نیشتەجێ و کاروباری مرۆیی نەتەوە یەکگرتووەکان لە عێراق و شاندێکی یاوەری کرد. کۆبوونەوەکە تایبەت بوو بە رێکارەکانی کۆتاییهێنان بە ئەرکی یونامی و رادەستکردنەوەی بارەگاکەیان لە هەولێر.
فەرمانگەی پەیوەندییەکانی دەرەوە لە راگەیێندراوێکدا دەڵێت، لە دیدارەکەدا سەفین دزەیی کورتەیەکی لەسەر بارودۆخی هەرێمی کوردستان و ئاڵۆزییەکانی ناوچەکە خستەڕوو، هیوای خواست "ئاشتی و سەقامگیری جێگەی شەڕ و ململانێ بگرێتەوە."
بەگوێرەی راگەیێندراوەکە، بەرپرسی فەرمانگەی پەیوەندییەکانی دەرەوە سوپاسی رۆڵی نەتەوە یەکگرتووەکانی کردووە لە پشتگیریکردنی پرۆسەی دیموکراسی، سەروەریی یاسا، حوکمڕانیی باش و پەرەپێدانی تواناکان لە هەرێمی کوردستان و عێراقدا لەماوەی ساڵانی رابردوودا.
لای خۆیەوە، غولام ئیسحاقزای سوپاسی هاوکاریی بەردەوامی دامەزراوەکانی حکومەتی هەرێمی کوردستانی کرد بۆ سەرخستنی پڕۆژەکانی نەتەوە یەکگرتووەکان و رایگەیاند: "هیوادارین حکومەتی هەرێمی کوردستان بەردەوام بێت لە هەماهەنگی لەگەڵ ئاژانسەکانی دیکەی نەتەوە یەکگرتووەکان کە لە هەرێمی کوردستان دەمێننەوە و درێژە بە کارەکانیان دەدەن."
هەر لە چوارچێوەی سەردانەکەدا، لە رێوڕەسمێکی تایبەتدا لە بارەگای نەتەوە یەکگرتووەکان لە هەولێر، یاداشتنامەی رادەستکردنەوەی بارەگاکە لە نێوان سەفین دزەیی و غولام ئیسحاقزای واژۆکرا و بەوەش بارەگاکە بە فەرمی گەڕایەوە ژێر دەسەڵاتی حکومەتی هەرێمی کوردستان.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ