رووداو دیجیتاڵ
بەیانی ئەمڕۆ یەکشەممە لەسەر رێگەی نێوان کەرکووک - تکریت، رووداوێکی هاتووچۆ روویدا، بەهۆیەوە چوار کەسی یەک خێزان گیانیان لەدەست دا.
سامان یابە، گوتەبێژی تەندروستیی کەرکووک بە تۆڕی میدیایی رووداوی گوت: "لە پێکدادانێکی نێوان دوو ئۆتۆمبێل، لەسەر رێگەی نێوان کەرکووک- تکریت، چوار ئەندامی خێزانێک گیانیان لەدەستداوە، کە سێ پیاو و ژنێکن".
رووداوەکە لەنێوان بارهەڵگرێکی بچووک و بارهەڵگرێکی گەورە روویداوە.
گوتەبێژی تەندروستیی کەرکووک گوتی: "قوربانییەکان خەڵکی تکریت-ن، تەرمەکانیان رەوانەی دادپزیشکیی کەرکووک کران".
هەر ئەمڕۆ رووداوێکی هاتووچۆ لەسەر رێگەی نێوان تەلعەبتە - بەعاج لە سنووری پارێزگای نەینەوا روویداوە، بەهۆیەوە کەسێک گیانی لەدەستداوە و سێی دیکەش بریندار بوون.
بەگوێرەی راپۆرتێکی وەزارەتی پلاندانانی عێراق کە مانگی شەشی ئەمساڵ بڵاویکردەوە، ساڵی رابردوو 11552 رووداوی هاتووچۆ لە عێراق روویانداوە و لە ئەنجامدا 3019 کەس گیانیان لەدەستداوە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ