رووداو دیجیتاڵ
دوایین کۆبوونەوەی شاندی دانوستاندنکاری پارتی دیموکراتی کوردستان و یەکێتیی نیشتمانیی کوردستان زیاتر لە مانگێکی بەسەردا تێپەڕیوە، سەرچاوەیەکی باڵا لە یەکێتی دەڵێت: هیچ وادەیەک بۆ کۆبوونەوە دیارینەکراوە. جێگری سەرۆکی دیوانی پەرلەمانی کوردستانیش بە رووداوی گوت: "بۆ دانیشتن، پەرلەمان چاوەڕێی رێککەوتنی حیزبەکانە."
14ی ئابی 2025، لە مەکتەبی سیاسیی یەکێتیی نیشتمانیی کوردستان لە هەولێر، هەردوو شاندی دانوستاندکاری یەکێتی و پارتی کۆبوونەوە. بەپێی راگەیێندراوی هاوبەشیان، "پێویستە هەوڵی چڕ و جیدی بدرێت بۆ ئەوەی مانگی ئەیلوول، خولی شەشەمی پەرلەمانی کوردستان دەست بە کار و چالاکیی ئاسایی و یاسایی خۆی بکات."
"بەمزووانە پارتی و یەکێتی کۆنابنەوە و پەرلەمان کارا ناکرێتەوە"
ئەمڕۆ دووشەممە، ئەندامێکی شاندی دانوستاندنکاری یەکێتیی نیشتمانیی کوردستان قسەی بۆ رووداو کرد و گوتی: "باوەڕناکەم بەم نزیکانە یەکێتی و پارتی کۆببنەوە، مەگەر لەناکاو دۆخەکە بگۆڕدرێ".
ئەو ئەندامەی شاندی دانوستاندنکاری یەکێتی ئاماژەی بەوەشکرد، کۆنەبوونەوەی دوو لایەنی سەرەکی، بە واتای کارانەبوونی پەرلەمان دێ و هیچ وادەیەکیش بۆ کۆبوونەوە دیاری نەکراوە.
بەرپرسێکی پارتی: ئامادەکاری بۆ هەڵبژاردنی عێراق کۆبوونەوەکانی دواخستووە
شێخ جەعفەر مستەفا، ئەندامی ئەنجوومەنی باڵای تێکۆشەرانی پارتییە و پێشتریش بەرپرسی لقی خانەقین بووە، لەبارەی پەیوەندییەکانی حیزبەکەی لەگەڵ یەکێتی، قسەی بۆ رووداو کرد و گوتی، "پەیوەندییەکە خراپ نییە، چاوەڕێی هەڵبژاردنی عێراق دەکەن و ئامادەکاری بۆ چۆنێتی بەشداریکردن لەو هەڵبژاردنە دەکەن."
هاوکات، حوسێن کەلاری، بەرپرسی لقی گەرمیانی پارتی دیموکراتی کوردستان بە رووداوی راگەیاند: "هەست بە هیچ ساردییەک ناکەم لەنێوان پارتی و یەکێتی، بەردەوام کار بۆ دانیشتنی پەرلەمانی کوردستان دەکرێ".
25ی ئاب، نێچیرڤان بارزانی، سەرۆکی هەرێمی کوردستان، لەبارەی پێکهێنانی کابینەی نوێی حکومەتی هەرێمی کوردستان رایگەیاند: "گفتوگۆ لەنێوان پارتی و یەکێتی بەردەوامە، بەڵام هیچ کاتێک دیار نییە و ئەوەی هەیە گفتوگۆیەکی تەواو هەیە".
سەعدی پیرە: سەرۆکی کاتی بۆ پەرلەمان چارەسەرە
سەبارەت بە هەوڵەکان بۆ دەستپێکردنەوەی دانیشتنەکانی پەرلەمان، سەعدی ئەحمەد پیرە، ئەندامی مەکتەبی سیاسیی یەکێتی بە رووداوی راگەیاند: "هەنگاوێکی دروستە و متمانەی خەڵک، دۆستان و کۆمەڵگەی نێودەوڵەتی بە هەرێمی کوردستان زیاددەکات، چونکە نیشانی دەدات هەرێمی کوردستان لە چەقبەستووییدا نامێنێتەوە و بەرەو پێکهێنانی حکومەت هەنگاو دەنێت."
ئەو ئەندامەی مەکتەبی سیاسیی یەکێتی ئاماژەی بە ئەزموونی پێشووی دانانی سەرۆکێکی کاتی بۆ پەرلەمان کرد، کاتێک ڤالا فەرید ئەو پۆستەی وەرگرت تاوەکو حکومەت پێکهێندرا و گوتی: "رێگەچارەی زۆر هەیە، خەڵکی شارەزا و پسپۆڕ لەنێو ئەندامانی پەرلەمان هەن کە دەتوانن ئەو ئەرکە لە ئەستۆ بگرن."
جێگری سەرۆکی دیوانی پەرلەمان: پەرلەمان ئامادەیە و چاوەڕێی حیزبەکانین
هیوا نەسرەدین، جێگری سەرۆکی دیوانی پەرلەمانی کوردستان بە رووداوی راگەیاند، تاوەکو لایەنە سیاسییەکان رێژەی یاسایی پەرلەمانتاران تەواو نەکەن، پەرلەمان ناتوانێت کۆببێتەوە.
هیوا نەسردەین گوتی: "ئێمە وەک پەرلەمانی کوردستان، چاوەڕێی تەواوکردنی رێژەی یاسایین و پەرلەمان ئامادەیە بۆ دانیشتن".
لەبارەی هەوڵی حیزبەکانیش (بەتایبەت پارتی و یەکێتی) بۆ کۆبوونەوە گوتی: "تاوەکو ئێستا هیچمان پێ نەگوتراوە."
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ