رووداو دیجیتاڵ
لە پارێزگای ئادانای تورکیا پیاوێک دوای ئەوەی هاوژینەکەی ماڵ جێدەهێڵێت، بە دەمانچە دوو منداڵەکەی دەکوژێت و دواتر کۆتایی بە ژیانی خۆیشی دەهێنێت. ئەو پیاوە پێشتر لە سۆشیاڵ میدیا نووسیویەتی: "ژن دەتوانێت بتکاتە وەزیر و دەشتوانێت ریسوات بکات."
رووداوەکە شەوی پێنجشەممە، 16-01-2026 لە یەکێک لە گەڕەکەکانی شارۆچکەی ساریچام لە ئادانا روویداوە.
بەگوێرەی زانیارییەکان، سەرگەن ئاڵتونباش، تەمەن 34 ساڵ، دوای ئەوەی لەگەڵ هاوژینەکەی دەبێتە دەمەقاڵێیان و ژنەکەی ماڵ بەجێدەهێڵێت و ناگەڕێتەوە، دەچێتە سەر دوو منداڵەکەی کە تەمەنیان شەش و هەشت ساڵان بووە.
سەرگەن ئاڵتونباش بە دەمانچە هەردوو منداڵەکەی (کوڕێک و کچێک) کوشتووە و دواتریش بە هەمان دەمانچە کۆتایی بە ژیانی خۆی هێناوە.
دوای ئاگادارکردنەوەیان، تیمەکانی پۆلیس و فریاگوزاریی تەندروستی گەیشتوونەتە شوێنی رووداوەکە و تەرمی باوکەکە و دوو منداڵەکەیان لەنێو ماڵەکەدا دۆزیوەتەوە.
ئەو پیاوە چەند مانگێک بەر لە رووداوەکە لە هەژماری خۆی لە تۆڕە کۆمەڵایەتییەکان پۆستێکی کردووە و نووسیویەتی: "ژنێک دەتوانێت بتکات بە وەزیر و دەشتوانێت ریسوات بکات."
تەرمەکان رەوانەی دادپزیشکی کراون و پۆلیسی ئاداناش لێکۆڵینەوەی لە رووداوەکە دەستپێکردووە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ