رووداو دیجیتاڵ
سەرۆکی شارەوانیی کەسنەزان رایدەگەیێنێت، پار بەهای نزیکەی ملیارێک و 200 ملیۆن دینار پرۆژەی خزمەتگوزارییان لە سنوورەکەدا جێبەجێکردووە. دەشڵێت، "چوار هەڵمەتیان بۆ کۆکردنەوەی سەگی بەرەڵا کردووە و نزیکەی 340 سەگ براونەتە شێڵتەر."
عەلی رەشاد، سەرۆکی شارەوانیی کەسنەزان، میوانی بەرنامەی مژاری رادیۆی رووداو بوو، باسی پرۆژە خزمەتگوزارییەکان و کێشە و گرفتەکانی سنووری شارەوانییەکەیانی کرد و گوتی، پار لە زۆرینەی گەڕەکەکان پرۆژەی خزمەتگوزارییان هەبووە، لەوانە؛ گەڕەکەکانی حەسەن ئاوا، قەرەبوو، خۆڕاگر، 11ی ئازار و کەمئەندامان پرۆژەیان بۆ جێبەجێ کراوە.
گوتیشی، بەهای ئەو پرۆژانە ملیارێک و 200 ملیۆن دینار بووە، بەشێوەیەک پرۆژەکان جۆراوجۆربوون، رێگەسازی، تۆڕی ئاوەڕۆ و شۆستە بوون.
لەبارەی ئەو گەڕەکانەی کە تاوەکو ئێستا پێویستان بە خزمەتگوزاری هەیە و وەکو پێویست خزمەتگوزارییان پێنەگەیشتووە، سەرۆکی شارەوانیی کەسنەزان دەڵیت: "هێشتا گەڕەکەکانی 11ی ئازار، خۆڕاگر و حەسەن ئاوا پێویستی زیاتریان بە خزمەتگوزاری هەیە و دەرخستەیان بۆکراوە بۆ ئەوەی خزمەتگوزاری پێویستیان بۆ بکرێت."
ناوچەی پیشەسازیی کەسنەزان کە رووبەرەکەی زیاتر لە 608 دۆنمە، پار حکومەتی هەرێمی کوردستان بڕیاریدا خزمەتگوزاریی شەقام و ئاوەڕۆی لولەیی و سندووقی بۆ ناوچە پێشەسازییەکە جێبەجێ بکرێت.
عەلی رەشاد دەڵێت: "ساڵی رابردوو حکومەت رەزامەندی دەربڕی لەسەر تەرخانکردنی 7.5 ملیار دینار بۆ ناوچەی پیشەسازیی کەسنەزان. بۆ قیرتاوکردن و دروستکردنی ئاوەڕۆی لولەیی و سندووقی، پرۆژەکە بانگەوازی بۆکراوە بۆ ئەوەی بدرێتە تەندەر و بخرێتەواری جێبەجیکردنەوە."
لەبارەی هەنگاوەکانی شارەوانی کەسنەزان بۆ دابەشکردنی زەوی بەسەر فەرمانبەران، سەرۆکی شارەوانیی کەسنەزان گوتی: "بۆ دابەشکردنی زەوی، رووپێوی درۆنی کراوە و نەخشەی کەرتی ئامادەکراوە، لەگەڵ نەخشەدانانی ئاوەدانی هەولێر کاری لەسەر کراوە."
گوتیشی، بۆ مۆڵەتی زەویی سندوویش لە ماوەی رابردوودا 169 مامەڵەی هاونیشتمانییان نووسراویان بۆکراوە، 94 یان پەسەندکراون و دەستکراوە بە دروستکردنی خانووەکانیان، ئەوانی دیکە بەگوێرەی رێکارە یاساییەکان کاریان بۆ دەکرێت.
چەند هاونیشتمانییەک لە کەسنەزان پەیوەندییان بە بەرنامەی مژاری رادیۆی رووداو کردووە و دەڵێن، "سەگی بەرەڵا و بێلانە لەنێو گەڕەکەکان زۆربوون."
عەلی رەشاد ئامەژی بەوەکرد، "لەماوەی رابردوودا چوار جار هەڵمەت کراوە و نزیکەی 340 سەگ کۆکراونتەوە و براونەتە شێڵتەر."
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ