هەڵەیەک روویدا! دووبارە هەوڵبدە
دووکانێک لە بازاڕی وشکەفرۆشانی سلێمانی
رووداو - سلێمانی
لە بازاڕی وشکەفرۆشانی سلێمانی، جووڵەی کڕین و فرۆشتن بەراورد بە جاران کەمی کردووە. کڕیار و فرۆشیار گلەیی لە گرانبوونی نرخی بەشێک لە پێداویستییەکانی رۆژانە دەکەن و هۆکارەکەشی بۆ دۆلار و گومرگ دەگەڕێننەوە.
نووری ئەحمەد، فرۆشیارێکی بازاڕەکەیە و دەڵێت: "هەفتەیەکە 10 تەبەق هێلکەم هێناوە، تەنیا دوو دانەم فرۆشتووە، ئەوانیش بە قەرز بوون؛ هەر دێینە دووکان و بە دەستی بەتاڵ دەگەڕێینەوە."
عەبدوڵڵا محەممەد، فرۆشیارێکی دیکەیە و ئاماژە بەو کاڵایانە دەکات کە گران بوون: "ئەوەی زیاتر گران بووە رۆن و زەیتە، نزیکەی چوار هەزار دینار چووەتە سەر نرخەکەی و بازاڕیش نییە."
شاخەوان فایەق، کڕیارێکە و چووەتە بازاڕەکە بۆ کڕینی برنج. ئەو بە رووداوی گوت: "برنجم کڕیوە، بەراورد بە جارەکانی پێشوو فەردەی هەزار دیناری چووەتە سەر؛ پێموایە هۆکارەکەی گومرگی عێراقە."
نەورۆز سەلیم، کڕیارێکی دیکەیە و دەڵێت: "من کەم دێمە بازاڕ، بەڵام ئەمڕۆ کە شتم کڕی گوتیان گرانبووە و هۆکارەکەی نرخی دۆلارە."
مستەفا شێخ عەبدولڕەحمان، سەرۆکی یەکێتیی هاوردە و ناردنکارانی کوردستان هۆکاری گرانبوونی کاڵاکان بۆ دوو خاڵ دەگەڕێنێتەوە؛ یەکەمیان زیادکردنی نرخی گومرگە لەلایەن عێراقەوە و دووەمیشیان "بازرگانانی کورد کاڵا بە نرخی دۆلار بە گرانتر دەکڕن، چونکە پاڵپشتیی عێراقیان نییە."
چاوەڕوان دەکرێت بە دابەشکردنی مووچەی فەرمانبەران، کەمێک جووڵە بۆ بازاڕ بگەڕێتەوە و دۆخەکە بەرەو ئاساییبوونەوە بچێت.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ