رووداو دیجیتاڵ
سەرۆکی هەرێمی کوردستان پێشوازی لە بەرپرسی نەتەوە یەکگرتووەکان و رێکخەری نیشتەجێ بۆ عێراق کرد و جەختی لە گرنگیی بەردەوامیی پشتگیری و هاوکارییەکانی کۆمەڵگەی نێودەوڵەتی بۆ عێراق و هەرێمی کوردستان کردەوە.
کۆبوونەوەکە رۆژی دووشەممە، 16ـی ئاداری 2026 لە هەولێر بەڕێوەچوو. بەپێی راگەیێندراوی سەرۆکایەتیی هەرێمی کوردستان، دۆخی سیاسی و ئەمنیی عێراق و چالاکییەکانی نەتەوە یەکگرتووەکانیان تاوتوێ کردووە.
ڤیدیۆ.. نێچیرڤان بارزانی، سەرۆکی هەرێمی کوردستان، پێشوازيی لە غولام محەممەد ئیسحاقزای، بەرپرسی نەتەوە یەکگرتووەکان و رێکخەری نیشتەجێ بۆ عێراق و شاندێكى ياوهرى کرد.
— Rudaw (@Rudawkurdish) March 16, 2026
سەرۆکایەتیی هەرێمی کوردستان دەڵێت: "نێچیرڤان بارزانی جەختی لە گرنگیی بەردەوامیی پشتگیری و هاوكارييهكانى كۆمهڵگه… pic.twitter.com/lgzkGmbHbk
نێچیرڤان بارزانی، سەرۆکی هەرێمی کوردستان سوپاسی ئامادەیی و رۆڵی نەتەوە یەکگرتووەکانی لە عێراق کرد و جەختی لە گرنگیی بەردەوامیی پشتگیری و هاوکارییەکانی کۆمەڵگەی نێودەوڵەتی بۆ عێراق و هەرێمی کوردستان کردەوە، ئەوەش "لەپێناو چەسپاندنی سەقامگیری و رووبەڕووبوونەوەی ئاڵنگارییەکاندا."
بەگوێرەی راگەیێندراوەکە، غولام محەممەد ئیسحاقزای سوپاسی هاوکاریی لایەنە پەیوەندیدارەکانی هەرێمی کوردستانی لەگەڵ نەتەوە یەکگرتووەکان کرد و پابەندیی رێکخراوەکەی بۆ بەردەوامیی یارمەتیدانی عێراق و هەرێمی کوردستان دووپات کردەوە.
سەرۆکایەتیی هەرێمی کوردستان دەڵێت: دۆخی ئاڵۆزی ناوچەکە و لێکەوتەکانی شەڕ، تەوەرێکی دیکەی کۆبوونەوەی سەرۆکی هەرێمی کوردستان و بەرپرسەکەی نەتەوە یەکگرتووەکان بووە. هەردوولاش جەختیان لە گرنگیی چڕکردنەوەی هەوڵە دیپلۆماسییەکان بۆ چارەسەرکردنی ئاشتییانەی کێشەکان کردەوە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ