رووداو دیجیتاڵ
لە رووداوێکی هاتووچۆدا لە پارێزگای کرماشانی رۆژهەڵاتی کوردستان، چوار کەس گیانیان لەدەستدا، سێیان ژنن و یەکێکیان پیاوە.
رووداوەکە شەوی دووشەممە، بە دووری 65 کیلۆمەتر لە ناوەندی شاری کرماشان و لەسەر رێگەی روانسەر- پاوە روویداوە.
مەسعود قەلعەسفیدی، بەڕێوەبەری فریاکەوتنی پارێزگای کرماشان رایگەیاند، "رووداوەکە نزیکەی کاژێر 21:20 خولەک روویداوە و دوو ئۆتۆمبێلی تایبەت لە جۆری پیجۆ 405 و پیجۆ پارس لە رێگەی روانسەر- پاوە و نزیک لە گوندی بنچەڵێ پێکیانداداوە."
بەڕێوەبەری فریاکەوتنی کرماشان گوتی، "بەهۆی سەختیی رووداوەکە، چوار کەس لە سەرنشینانی هەردوو ئۆتۆمبێلەکە گیانیان لەدەستداوە، کە سێیان ژنن و ئەوەی دیکەیان پیاوە."
ساڵانە لە ئێران و رۆژهەڵاتی کوردستان، هەزاران کەس بە رووداوی هاتووچۆ گیان لەدەستدەدەن.
بەگوێرەی دادپزیشکیی ئێران، لە 21-03-2024 تاوەکو 21-03-2025، 20 هەزار و 45 کەس لە رۆژهەڵاتی کوردستان و ئێران بە رووداوی هاتووچۆ گیانیان لەدەستداوە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ