ساتی تەقەکردن لەگایەک لە مەیدانی ئاژەڵانی هەولێر
رووداو دیجیتاڵ
ئەو کەسەی لە گرتەیەکی ڤیدیۆییدا لە مەیدانی ئاژەڵانی هەولێر دەردەکەوێت بە کڵاشینکۆف تەقە لە گایەک دەکات و مرداری دەکات، ئەمڕۆ لەلایەن پۆلیسی شارەوانیی هەولێرەوە دەستگیرکرا و بەپێی زانیارییەکانی رووداو، پەڕاوی لێکۆڵینەوەی بۆ کراوەتەوە.
دوای بڵاوبوونەوەی گرتەیەکی ڤیدیۆیی لە مەیدانی ئاژەڵانی هەولێر کە تێیدا کەسێک دەردەکەوێت بە چەک تەقە لە گایەک دەکات، ئەمڕۆ پێنجشەممە،15-11-2023، ئەو کەسە دەستگیرکرا، بەپێی زانیارییەکانی رووداو، دوێنێ لەلایەن قایمقامییەتی هەولێرەوە بەدواداچوون بۆ گرتە ڤیدیۆییەکە کراوە و ئەو کەسە دۆزراوەتەوە کە تەقەکە دەکات و لەلایەن پۆلیسی شارەوانییەوە دوای بڕیاری دادوەر دەستگیرکرا.
بەپێی سەرچاوەیەکی بەرپرسی پارێزگای هەولێر، ئەو کەسەی لەلایەن چەند کەسێکی ئامادەبووی مەیدانی ئاژەڵانەوە وێنە دەگیرێت کاتێک تەقەکان دەکات، لێپێچینەوەی لەگەڵدا دەکرێت و رەوانەی دادگە دەکرێت.
لە گرتەیەکی ڤیدیۆییدا کە دوێنێ چوارشەممە بڵاوکرایەوە، ئەو کەسەی تەقەکان دەکات چەند گوللـەیەک دەنێت بە گایەکەوە بۆ ئەوەی رایبگرێت و گایەکە بەهۆی کاریگەریی گوللـەکانەوە رادەوەستێت و خوێن بە لاشەیدا دێتە خوارەوە و دواتر دەکەوێت.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ