رووداو دیجیتاڵ
پارێزگای هەولێر دەڵێت، دوو پڕۆژەی "ستراتیژی" لە تەواوبووندان؛ یەکێکیان بەرزە پردی ئۆڤەرفلای دووڕێیانی (کۆڕێ - شەقڵاوە - هەولێر)ـە و 90%ـی کارەکانی تەواو بووە؛ ئەوی دیکەش بەنداوی گۆمەسپانە.
پارێزگای هەولێر لە راگەیێندراوێکدا بڵاویکردەوە، پڕۆژەی دروستکردنی بەرزە پردی ئۆڤەرفلای لە دووڕییانی (کۆڕێ - شەقڵاوە - هەولێر) لەگەڵ یەکخستن و فراوانکردنی رێگەی دەربەندی کۆڕێ - شەقڵاوە، کە بە گوژمەی 40 ملیار دینار لە سەر بودجەی پەرەپێدانی پارێزگای هەولێر دەستی پێکرا و پێکهاتووە لە دوو پردەکەی سەر رێگەی کۆڕێ - شەقڵاوە، ئێستا کاری تێدادەکرێت و 90%ـی کارەکانی تەواو بووە.
بەگوێرەی راگەیێندراوەکە، "پڕۆژەکە پڕۆژەیەکی ستراتیژیی گرنگی شاری هەولێرە و بە شێوازێکی مۆدێرن و سەردەمیانە دروستکراوە و جگە لەوەی سوودێکی زۆری بۆ هاووڵاتییان و خەڵکی ناوچەکە بەگشتی هەیە، قەرەباڵخی و رووداوەکانی هاتووچۆش لەو رێگە سەرەکی و ستراتیژییە کەم دەکاتەوە".
لە راگەیێندراوێکی دیکەدا پارێزگای هەولێر دەڵێت، "بەنداوی گۆمەسپان لە هەولێر، کە یەكێكە لە پرۆژە ستراتیژییە گرنگەكانی كابینەی نۆیەمی حكومەتی هەرێمی كوردستان بۆ گەشتیاری و گلدانەوەی ئاو و بۆ كەشوهەوای هەولێریش سوودی زۆری هەیە، له نزیكترین ماوهدا کارەکانی كۆتایی دێت و دەبێتە گەورەترین بەنداو لە هەولێر و لەسەر ئاستی هەرێمی كوردستانیش دوای بەنداوەکانی دووكان و دەربەندیخان دەبێتە سێیەم گەورەترین بەنداو".
تێچووی دروستکردنی بەنداوی گۆمەسپان 95 ملیار دینارە؛ رووبەرەکەی شەش ملیۆن و 125 هەزار مەتر دووجایە، بەرزییەکەی 70 مەتر و درێژییەکەی 512 مەترە و دەتوانێت 115 ملیۆن مەتر سێجا ئاوی باراناو کۆ بکاتەوە. پارێزگای هەولێر دەڵێت، یەکەم جارە لەسەر ئاستی هەرێمی کوردستان و عێراق کۆنکرێتی جۆری ئارسیسی لە دروستکردنی بەنداودا بەکاربهێرێت.
پارێزگای هەولێر ئاماژەی بەوەکردووە، شەو و رۆژ کار لە دروستکردنی بەنداوەکەدا دەکرێت و "بەم زووانە" ئاوی باراناوی تێدا گلدەدرێتەوە و ئاماژە بەوەش دەکات، بە تەواوبوونی رۆڵی دەبێت لە پاراستنی سامانی ئاو، بەرزکردنەوەی ئاستی ئاوی ژێر زەوی و بەرەنگاربوونەوەی وشکەساڵی؛ دەشبێتە سەرچاوەیەکی دابینکردنی ئاوی پاک بۆ هەولێر.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ