رووداو دیجیتاڵ
وەزارەتی دەرەوەی عێراق دەڵێت، حکومەتی سویسرا بڕیاری داوە قەدەخەی گەشتکردن بۆ ژمارەیەک شاری عێراق و هەرێمی کوردستان هەڵبگرێ. بڕیارەکە هەریەک لە بەغدا، بەسرە، نەجەف، بابل، کەربەلا و هەرێمی کوردستان دەگرێتەوە.
بەگوێرەی راگەیێندراوی وەزارەتی دەرەوەی عێراق، هەڵگرتنی قەدەخەکە لە ئەنجامی هەوڵە دیپلۆماسییەکانی وەزارەتی دەرەوەی عێراق بە هاوئاهەنگی لەگەڵ وەزارەتی دەرەوەی سویسرا و لایەنە پەیوەندیدارەکان بووە.
وەزارەتی دەرەوەی عێراق دەڵێت: "ئەم بڕیارە متمانەی نێودەوڵەتی روو لە زیادبوون بە دۆخی ئەمنی و سەقامگیریی شارەکانی عێراق نیشان دەدات و هەنگاوێکی ئەرێنییە بۆ بەهێزکردنی پەیوەندییە دوو قۆڵییەکانی نێوان کۆماری عێراق و سویسرا."
وەزارەتی دەرەوەی عێراق سوپاسی هاوئاهەنگیی سویسرای کردووە و رایگەیاندووە، بەردەوام دەبن لە کاری دیپلۆماسی بۆ خزمەتکردنی بەرژەوەندییە هاوبەشەکان و بەهێزکردنی پێگەی ئەرێنیی عێراق لەسەر ئاستی نێودەوڵەتی.
باڵیۆزخانەی سویسرا لە عێراق رۆژی 3-9-2024، لە بەغدا کرایەوە، دوای 33 ساڵ لە داخستنی لە ساڵی 1991 بەهۆی شەڕی کەنداوەوە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ