رووداو دیجیتاڵ
کەشناسیی هەرێمی کوردستان پێشبینی دەکات ئەمڕۆ لە چیای شنگال بەفر ببارێت. ئەمڕۆ و سبەی "نمەباران و بەفری کەم" لە سنووری پارێزگاکانی دهۆک و هەولێر ببارێت.
ئەمڕۆ سێشەممە، کەشناسیی هەرێمی کوردستان لە راگەیێندراوێکدا بڵاوی کردەوە: "ئەمڕۆ لە سنووری پارێزگای سلێمانی ئاسمانی نیمچەهەور و لە پارێزگای هەولێر تاوەکو کاتەکانی نیوەڕۆ تەم دەبێت. لەگەڵ هاتنی کاریگەری نزمە پالەپەستۆیەکی لاوازی دەریای نێوەڕاست بۆ سەر سنووری پارێزگای دهۆک کەشی ئەو پارێزگایە و ناوچە شاخاوییەکانی بەردەوام هەور دەبێت لەگەڵ نمەبارانی کەم و بارینی بەفر لەسەر ناوچە شاخاوییە بەرزەکان".
کەشناسیی هەرێمی کوردستان ئاماژەی بەوە کردووە، "کاریگەری ئەم بەفر و بارانبارینەی هەیە لەسەر بەشێک لە قەزای شنگال و چیای شنگال لە بەرزی 1400 مەتر ئەگەری بەفربارینی هەیە".
لەبارەی کەشوهەوای سبەیەوە کەشناسیی رایگەیاندووە: "بەیانی زوو ئەگەری دروستبوونی تەم هەیە لە ناوچە شاخاوییەکان. لە سەنتەری پارێزگاکان ئاسمان نیمچەهەور دەبێ؛ لە بەرەبەیانی زوودا ئەگەری بەفرێکی کەم لە ناوچە شاخاوییە سنوورییەکان هەیە".
د. لوقمان موفتی، شارەزای کەشوهەوا بە تۆڕی میدیایی رووداوی گوت: "پێشبینی دەکرێ لە چیای شنگال بەفر ببارێ، چونکە کاریگەری شەپۆلەکە لەو سنوورە و دەڤەری بادینان و بەگشتیی پارێزگای دهۆک زیاترە، دواتر ناوچە شاخاوییەکانی پارێزگای هەولێر و لە هەڵەبجە و سلێمانی کاریگەری نابێ".
ئەو شارەزایەی کەشوهەوا پێشنیی دەکات، سبەی لە سنووری پارێزگاکانی هەولێر و دهۆک "نمەبارانی لاواز" و لە ناوچە شاخاوییەکانی هەردوو پارێزگاکە بەفرێکی کەم ببارێت
شاڵاو هیدایەت شارەزایەکی دیکە و بە رووداوی گوت: "شەپۆلەکە بە گشتیی لاوازە، تەنیا لە ناوچە شاخاوییەکان کاریگەریی زیاتری دەبێ و ئەگەری بەفربارینێکی زۆر کەم هەیە".
بەگوێرەی کەشناسیی هەرێمی کوردستان، پلەی گەرما سبەی بەمشێوەیە دەبێت:
هەولێر: 13 پلەی سیلیزی
سلێمانی: 12 پلەی سیلیزی
دهۆک : 12 پلەی سیلیزی
زاخۆ: 13 پلەی سیلیزی
کەرکووک: 15 پلەی سیلیزی
هەڵەبجە: 14 پلەی سیلیزی
سۆران: 9 پلەی سیلیزی
ئاکرێ: 12 پلەی سیلیزی
ئامێدی: 9 پلەی سیلیزی
گەرمیان: 15 پلەی سیلیزی
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ