پۆڵا تاڵەبانی میوانی بووڵتەنی کاژێر 14 بوو کە زانا کایانی پێشکێشی دەکات
رووداو دیجیتاڵ
ئەندامێکی سەرکردایەتیی یەکێتی دەڵێت، بەمزووانە شاندی دانوستاندنکاری یەکێتی و پارتی بۆ پێکهێنانی حکومەت کۆدەبنەوە. گوتیشی، ''پێموایە دوای کۆبوونەوەی سەرۆکی یەکێتی و سەرۆکی حکومەت، پێکهێنانی حکومەت ماوەیەکی زۆر ناخایێنێت.''
ئەمڕۆ دووشەممە، 17-03-2025، پۆڵا تاڵەبانی، ئەندامی سەرکردایەتیی یەکێتیی نیشتمانیی کوردستان لەکاتی بەشداریکردنی لە بووڵتەنی کاژێر 14:00ـی تۆڕی میدیایی رووداو کە زانا کایانی پێشکێشی کرد، رایگەیاند، گفتوگۆکان لەنێوان یەکێتی و پارتیدا بۆ پێکهێنانی کابینەی نوێی حکومەت، ''بە شێوەیەکی باش بەرەو پێشەوە دەچن و لێکتێگەیشتن و پێشکەوتنی باش لە پڕۆسەکەدا هەیە.''
دوێنی، مەسرور بارزانی، سەرۆکوەزیرانی هەرێمی کوردستان و جێگری سەرۆکی پارتی دیموکراتی کوردستان لە هەولێر لەگەڵ بافڵ جەلال تاڵەبانی، سەرۆکی یەکێتیی نیشتمانیی کوردستان کۆبووەوە. پۆڵا تاڵەبانی گوتی: ''ئەوە دوا کۆبوونەوە بوو بۆ تەواوکردنی ئەو کۆبوونەوانەی پێشتر؛ بێگومان لە رۆژانی داهاتوودا هەوڵەکان چڕ دەبنەوە بۆ ئەوەی کە هەرچی زووترە کارەکانی پێکهێنانی کابینەی نوێی حکومەت تەواو بکرێن و کار بۆ دروستکردنی کابینەکە بکرێت.''
رووداو زانیویەتی شاندی دانوستاندنکاری پارتی و یەکێتی دووبارە کۆدەبنەوە. ئەو ئەندامەی سەرکردایەتیی یەکێتی گوتی: ''کۆبوونەوەکە لە دەرفەتێکی نزیکدا دەکرێت، نازانم بەیانییە یان دوو بەیانی، بەڵام ئەوەی کە دەیارە، لەدوای کۆبوونەوەکەی دوێنێ، بە زووترین کات دەکرێت.''
دوای کۆتاییهاتنی دیدارەکە لە پیرمام، مەسرور بارزانی و بافڵ تاڵەبانی کۆبوونەوەکەیان بە ''ئەرێنی و زۆر باش'' ناوبرد. پێشتریش لە رێگەی لیژنەکانەوە، پارتی و یەکێتی چەند جارێک کۆبوونەتەوە و تاوتوێی پێکهێنانی کابینەی نوێی حکومەتی هەرێمی کوردستانیان کردووە.
بەگوتەی پۆڵا تاڵەبانی، بەشێک لە کارەکانی کۆبوونەوەی شاندی دانوستاندنکاری هەردوولا، لەسەر دیداری سەرۆکی یەکێتی و سەرۆکی حکومەت وەستابوو و ''بێگومان دوای ئەو کۆبوونەوەیە، لە نزیکترین دەرفەتدا شاندەکانیش کۆدەبنەوە.''
ئەو ئەندامەی سەرکردایەتیی یەکێتی ئەوەشی خستەڕوو، لە کۆبوونەوەکەی نێوان مەسرور بارزانی و بافڵ تاڵەبانیدا، هەموو ئەو بابەتانەی کە پەیوەستن بە شێوازی کار، ستراتیژ و بەرنامەی حکومەت خراونەتە بەر باس و ''لە کۆبوونەوەکانی داهاتووشدا باس لە دابەشکردنی پۆستەکان دەکرێت.''
پۆڵا تاڵەبانی لەبارەی کاتی پێکهێنانی کابینەی نوێ گوتی: ''ناتوانم بڵێم چەند رۆژ یان چەند هەفتە، بەڵام پێموایە کارەکانی پێکهێنانی کابینەی نوێ زۆر ناخایێنێت.''
لە هەڵبژاردنی پەرلەمانی کوردستان، کە 20-10-2024 بەڕێوەچوو، پارتی دیموکراتی کوردستان زۆرترین کورسیی بەدەستهێنا کە 39 کورسی بوو، دوای ئەویش یەکێتیی نیشتمانیی کوردستان 23 کورسی و بەدوایدا نەوەی نوێ 15 کورسییان بەدەستهێنا.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ