هەڵەیەک روویدا! دووبارە هەوڵبدە
رووداو دیجیتاڵ
شەپۆلێکی خۆڵبارین بەشێکی هەرێمی کوردستانی گرتووەتەوە. کەشناسێک دەڵێت: "کاریگەرییەکە ئەمڕۆ دوای نیوەڕۆ کۆتایی دێ، بەڵام هەر لەم هەفتەیەدا ئەگەری خۆڵبارینی دیکە هەیە. "
ئەمڕۆ یەکشەممە 17ـی ئابی 2025، کەشناسیی هەرێمی کوردستان رایگەیاند، ئەمڕۆ ئاسمان ساماڵ و تۆزوخۆڵ دەبێت؛ کاریگەریی ئەم تۆزوخۆڵە بەشێک لە ناوچە جیاجیاکانى گرتووەتەوە؛ ئەمڕۆ بەردەوام دەبێت و لە هەندێ کاتدا کەم و لە هەندێ کاتدا زیاد دەکات.
بە گوێرەی کەشناسیی هەرێمی کوردستان، خۆڵبارین لە سنوورى ئیدارەى گەرمیان چڕە، بەڵام لە سنوورى ئیدارەى سەربەخۆی زاخۆ و پارێزگەى دهۆک کاریگەرییەکەی کەمتر دەبێت .
شاڵاو هیدایەت، شارەزای کەشناسی بە تۆڕی میدیایی رووداوی گوت: "لە دوێنێ شەوەوە شەپۆلێکی خۆڵبارین ناوچەکەمانی گرتووەتەوە. خۆڵبارینەکە لە ناوچەکانی عێراق بەراورد بە هەرێمی کوردستان چڕترە. پێشبینی دەکرێ دوای نیوەڕۆ کاریگەرییەکەی کەم ببێتەوە."
ئەو کەشناسە گوتی: "کاریگەری ئەم خۆڵبارینە لە بەشەکانی باکووری رۆژئاوای عێراقەوە سەرچاوەی گرتووە و پێشبینی دەکرێت کاریگەرییەکەی بۆ چەند کاژێرێک لەسەر ئەو ناوچانە بمێنێتەوە."
شاڵاو هیدایەت ئاماژەی بەوەش کرد، لە رۆژانی داهاتوودا ئەگەری هەڵکردنی بای رۆژئاوا هەیە و ئەوەش هۆکارە بۆ ئەوەی خۆڵ لە بیابانەکانی نێوان عێراق و سووریاوە بێت و بە شێوەی لاواز و مامناوەند ناوچەکەمان بگرێتەوە.
بە گوتەی ئەم کەشناسە، ئەگەری خۆڵبارینی دیکە لەم هەفتەیەدا هەیە و دەکرێ ناوچەکانی کەرکووک، گەرمیان و هەولێر بگرێتەوە.
لەبارەی کەشوهەوای سبەیەوە کەشناسیی هەرێمی کوردستان دەڵێت، "ئاسمان ساماڵ و ئەگەرى کاریگەریى تۆزوخۆڵ لەسەر بەشێک لە ناوچەى جیاجیا دەبێت. پلەی گەرما کەمێک نزم دەبێتەوە."
پلەی گەرمای سبەی بەگوێرەی راگەیێدنراوی بەڕێوەبەرایەتیی کەشناسی و بوومەلەرزەزانی هەرێمی کوردستان بەم شێوەیەی خوارەوە دەبێت:
هەولێر: 42 پلەی سیلیزی
سلێمانی: 40 پلەی سیلیزی
دهۆک: 41 پلەی سیلیزی
کەرکووک: 44 پلەی سیلیزی
زاخۆ: 42 پلەی سیلیزی
هەڵەبجە: 42 پلەی سیلیزی
سۆران: 40 پلەی سیلیزی
حاجی ئۆمەران: 31 پلەی سیلیزی
گەرمیان: 44 پلەی سیلیزی
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ