شەقامێکی مەریوان دوای یەکەم بارانبارینی پاییزی ئەم ساڵ
رووداو دیجیتاڵ
یەکەم بارانی پاییزە لە سنووری مەریوان لە پارێزگای سنە باری. لە رۆژی شەممەوە شەپۆلێکی بارانبارین ناوچەکەی گرتووەتەوە. لە ماوەیەکی کەمدا بارانێکی زۆر باری و بووە هۆی پەنگخواردنەوەی ئاو لە شەقامەکان.
55 رۆژ بەسەر دەستپێکردنی وەرزی پاییز لە رۆژهەڵاتی کوردستان تێدەپەڕێ و ئەمە دەبێتە یەکەم بارین لە سنووری ناوچەی مەریوان.
لە 24 کاژێری رابردوودا زیاترین ئاستی بارانبارین لە پارێزگای سنە، لە شاری مەریوان تۆمارکراوە و زیاتر لە 30 ملیمەتر باران لەو شارە باریوە.
خەڵکی مەریوان بە بارینی باران دڵخۆشن، بەڵام هێشتا نیگەرانییەکانیان لەبارەی ئەگەری بەردەوامیی وشکەساڵی نەڕەویوەتەوە.
ئێران و رۆژهەڵاتی کوردستان لە شەشەمین ساڵی وشکەساڵیدان و وڵاتەکە رووبەڕووی قەیرانێکی کەموێنەی ئاو بووەتەوە و چەندین شاری گەورەی وەک تاران، کەرەج و مەشهەد کێشەی ئاوی خواردنەوەیان هەیە.
بەپێی پێشبینییەکانی بەڕێوەبەرایەتیی کەشناسیی پارێزگای سنە، شەپۆلی بارانبارینەکە لە سنووری پارێزگاکە تاوەکو کۆتایی رۆژی دووشەممە بەردەوام دەبێت، لە ناوچە شاخاوییەکانیش پلەی گەرما دادەبەزێ و ئەگەری بارینی بەفر هەیە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ