هەڵەیەک روویدا! دووبارە هەوڵبدە
رووداو دیجیتاڵ
سەرۆکی دەستەی هەڵبژاردنەکانی هەرێمی کوردستان دەڵێ، 5%ـی کارمەندانی سەر سندووقەکان یەدەگ بوون و ئەوانیش پارەیان پێدەدرێ.
بۆ هەڵبژاردنی خولی شەشەمی پەرلەمانی عێراق، ناوی 34 هەزار کەس لە هەرێمی کوردستان لە تیروپشکدا دەرچوو وەک کارمەندی سەر سندووق کە بەسەر سێ پارێزگای هەولێر، سلێمانی و دهۆک دابەشکرابوون.
رۆژی دووشەممە، 17ـی تشرینی دووەمی 2025، نەبەرد عومەر، سەرۆکی دەستەی هەڵبژاردنەکانی هەرێمی کوردستان لە کۆمیسیۆنی باڵای سەربەخۆی هەڵبژاردنەکان، بە تۆڕی میدیایی رووداوی راگەیاند: "چەند مانگێک دوای هەڵبژاردن، کارمەندانی سەر سندووقەکان شایستە داراییەکانیان وەردەگرن. کارمەندی یەدەگیش لە هەموو پارێزگایەک دانرابوون و ئەوانیش پارە وەردەگرن".
سەرۆکی دەستەی هەڵبژاردنەکانی هەرێمی کوردستان گوتی: "مووچەی کارمەندانی یەدەگ کەمترە لە کارمەندەکانی دیکە و هەر یەکێکیان 100 هەزار دینار وەردەگرێ".
بە گوتەی نەبەرد عومەر، کارمەندان دەبێت کارتی بانکییان هەبێت، چونکە لەو رێگەیەوە شایستەکانیان وەردەگرن و دەتوانن لە ئامێرەکانی ATMـەوە پارەکانیان رابکێشن.
ئەو کارمەندانە لە رۆژانی دەنگدانی تایبەت و گشتیدا لە زیاتر لە 39 هەزار وێستگە سەرپەرشتیی پرۆسەی دەنگدانیان کرد. لەو 34 هەزار کەسەی ناویان دەرچووە، 5%ـیان وەکو یەدەگ بوون، واتە 1700 کەس.
مووچەی ئەو کارمەندانە بەپێی ئەرکیان جیاوازە و سێ جۆرە. نەبەرد عومەر گوتی: "سەرپەرشتیارانی بنکەی دەنگدان 400 هەزار دینار وەردەگرن، بەڕێوەبەرانی وێستگە 300 هەزار دینار و کارمەندی سەر سندووقەکانیش 200 هەزار دینار وەردەگرن، بەڵام ئەوانەی فەرمانبەرن و سەرپەرشتیاری بنکەی دەنگدانن، 300 هەزار دیناریان پێدەدرێ، بەڕێوەبەری وێستگە 200 هەزار دینار و کارمەندی سەر سندووقەکانیش 150 هەزار دینار وەردەگرن".
ئەو کارمەندانەی لە هەرێمی کوردستان ناویان بۆ سەر سندووقەکان دەرچووە بەمشێوەیەن:
- پارێزگای هەولێر: 12 هەزار و 339 کەس
- پارێزگای سلێمانی: 13 هەزار و 340 کەس
- پارێزگای دهۆک: 8 هەزار و 256 کەس
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ