رووداو دیجیتاڵ
شەپۆلێکی بارانبارین پارێزگای کرماشانی رۆژهەڵاتی کوردستانی گرتووەتەوە. بەرپرسی بەڕێوەبەرایەتیی رێگەوبان و گواستنەوەی شاری گیلانی رۆژئاوای پارێزگاکە دەڵێت، پردێکی نێوان ئەو شارە و ناحیەی سومار رووخاوە.
ئەمجەد ئەفسەری، بەڕێوەبەری بەڕێوەبەرایەتیی رێگەوبان و گواستنەوەی شاری گیلانی رۆژئاوای پارێزگای کرماشانی رۆژهەڵاتی کوردستان رایگەیاند، بەهۆی بارانی بەخوڕی دوو رۆژی رابردووەوە پردی نێوان شارەکە و ناحیەی سومار رووخاوە و ئێستا هاتووچۆ لەو رێگەیەوە بە تەواوی وەستاوە.
ئەمجەد ئەفسەری ئاماژەی بەوە کرد، بەهۆی رووخانی پردەکەوە رێگەی هاتووچۆی پێنج گوند و هەروەها رێگەی نێوان دەروازەی سنووری سومار لەگەڵ ناوەندی شاری گیلانی رۆژئاوا داخراوە.
گیلانی رۆژئاوا شارێکی سنووریی رۆژهەڵاتی کوردستانە و دەکەوێتە باشووری رۆژئاوای پارێزگای کرماشان کە لەگەڵ خانەقین و جەلەولای باشووری کوردستان هاوسنوورە.
بەڕێوەبەری بەڕێوەبەرایەتیی رێگەوبان و گواستنەوەی گیلانی رۆژئاوا گوتی، ئێستا بەهۆی رووخانی پردەکەوە لە رێگەی نێوان گیلانی رۆژئاوا- ئێوانەوە هاتووچۆ دەکرێت؛ ئاماژەی بەوەشکرد، بارانبارینی بەخوڕ، هەورە برووسکە و لافاو زیانی بە نزیکەی 70 کیلۆمەتر لە رێگەوبانەکانی پارێزگاکە گەیاندووە.
بە گوێرەی کەشناسیی پارێزگای کرماشان، لە 72 کاژێری رابردوودا نزیکەی 60 ملیمەتر باران لە پارێزگاکە باریوە و زۆرترین بارانیش لە شاری پاوە بووە کە گەیشتووەتە 104 ملیمەتر.
کەشناسیی کرماشان دەڵێت، لە 72 کاژێری رابردوودا لە گیلانی رۆژئاوا زیاتر لە 46 ملیمەتر بارانبارین هەبووە و لە ئەمڕۆوە کاریگەریی شەپۆلەکە لاواز دەبێتەوە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ