ئەو سێ گەنجەی لە لیبیا دەستبەسەرکراون.
رووداو دیجیتاڵ
چالاكڤانێكی كۆچبەران دەڵێت 22 گەنجی هەرێمی كوردستان لە لیبیا دەستبەسەركراون و داوای پارەیان لێ دەكرێت. ژمارەیەك لە گەنجەكان لە گرتەیەکی ڤیدیۆییدا داوای هاوكاری لە حكومەتی هەرێمی كوردستان دەكەن.
لە ڤیدیۆکەدا كە بۆ تۆڕی میدیایی رووداو نێردراوە، سێ گەنج دەردەكەون و دەڵێن، لەلایەن قاچاخچییەكانی ئیدارەی راپەڕینەوە نێردراون و ئێستا لەژێر دەستی گرووپێكی مافیاکاندان لە لیبیا.
گەنجەكان خەڵكی قەزای پشدەرن و لە دیمەنەكەدا سێ كەس دەردەكەون، بەڵام وەكو خۆیان دەڵێن چوار كەسن و یەكێكیان تەندروستی ناجێگیرە بۆیە دەرنەكەوتووە.
بە گوتەی ئەو گەنجانە "گرووپە مافیاكە پێیانگوتوون، ئەگەر 10 دەفتەر دۆلار نەهێنن یەكی یەك گورچیلەیان دەردەهێنن و دەیفرۆشن".
دوو لە گەنجەكان ناویان سەروەر خدر عەبدوڵڵا و پێشەوا حوسێنە.
پێشەوا دەڵێت: "دایك و باوكم بە تەمەنن، ئەو بڕە پارەیە بە ئێمە نادرێت و داواكارین حكومەتی هەرێمی كوردستان بە هانامانەوە بێن".
رەنج پشدەری، چالاكڤانی بواری كۆچبەران بە تۆڕی میدیایی رووداوی گوت: "جگە لەو گەنجانە، 18 گەنجی دیكە پەیوەندییان بە منەوە كردووە و لەلایەن مافیاكانەوە دەستبەسەر كراون داوای بەهاناوەچوون دەكەن".
پشدەری گوتی، "رێگەی لیبیا پڕ مەترسییە و كوردێكی زۆریش بەكاری دەهێنن بۆ گەیشتن بە ئەورووپا، گرنگە گەنجان بزانن یاری بە ژیانی خۆیان دەكەن بە بەكارهێنانی ئەو رێگاتە".
گەنجەكان لە ڤیدیۆكەدا ناوی دوو قاچاخچی كورد دەهێنن و دەڵێن، ئەوان گەیاندوونیانەتە لیبیا و رادەستی كەسێكی سووریایی كردوون و ئەویش فرۆشتوونی بە مافیاكان.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ