دەنیز هێڤی ناسراو بە دەنیز گەڤەری و لۆگۆی کەنەکە.
رووداو دیجیتاڵ
ئەندامێکی کۆنگرەی نەتەوەیی کورد "کەنەکە" رایگەیاند ئەو کەسەی ئەمڕۆ لە بارەگاکەی ئەوان لە شاری هەولێر کوژرا، ئەندامی ئەوان بووە و خەڵکی گەڤەری باکووری کوردستانە، دەشڵێت: "رووداوەکە تیرۆریستییە و بکوژەکە لە کامێراکان بە روونی دەرکەوتووە."
دوای نیوەڕۆی ئەمڕۆ دووشەممە، 18-09-2023 ئەندامێکی کۆنگرەی نەتەوەیی کورد، بەناوی دەنیز هێڤی، ناسراو بە دەنیز گەڤەری، لە نێو بارەگای کەنەکە لە شاری هەولێر، هێرشی کرایە سەر و کوژرا.
شوکڕوڵڵا حەمەدئەمین، ئەندامی کۆنگرەی نەتەوەیی کورد "کەنەکە" لە ئۆفیسی شاری هەولێر، بە تۆڕی میدیایی رووداوی راگەیاند: "رووداوەکە کاژێر 1:30 روویداوە، کەسێک کە دەموچاوی نەپێچاوە و هیچ دەمامێکی نەبەستووە چووەتە سەر بارەگاکەمان لە گەڕەکی شۆڕشی شاری هەولێر و دوای ئەوەی لە دەرگای داوە ئەو هەڤاڵەمان دەرگای کردووەتەوە و بکوژ لە دیوی ژوورەوەی دەرگاکە چەند گوللەیەکی پێوەناوە و کوشتوویەتی."
ئەو ئەندامەی کەنەکە لەبارەی تەقەرەکەوە گوتی: "بەپێی شایەتحاڵەکان بکوژەکە دوای کوشتنی ئەو هەڤاڵەمان نزیکەی 50 مەترێک رایکردووە، دواتر بە ئاسایی خۆی رۆیشتووە و شوێنەکەی بەجێهێشتووە."
بە گوتەی شوکڕوڵڵا حەمەدەمین، ئەوان ماوەی زیاتر لە 10 ساڵ دەبێت بە فەرمی مۆڵەتی کارکردنیان لەشاری هەولێر هەیە. گوتیشی: "ئەو هەڤاڵەی ئێمە کە کوژراوە لە ئۆفیسی هەولێر کاری دەکرد و ئەندامی کۆنگرەی نەتەوەیی کورد بووە و لەلایەن ئاسایشی هەولێرەوە ناسراو بووە."
لەبارەی ناسنامەی بکوژی ئەو ئەندامەی کەنەکەوە، شوکڕوڵڵا حەمەدئەمین ئاشکرایکرد کە ئەوانەی لە نزیک رووداوەکەوە بوون و ئاگایان لێبووە پێیانگوتوون کە کەسێکی رەشتاڵە بووە و جانتایەکی لە شان بووە و بە پێ بووە و دوای ئەوەی لە دەرگای داوە دەنیز هێڤی دەرگای لێکردووەتەوە.
شوکڕوڵڵا حەمەدەمین دەڵێت ئەوە یەکەمجار ئەندامێکیان لە شاری هەولێر بکوژرێت و ئەوەش بە پێشهاتێکی مەترسیدار زانی و گوتی: "دەبێت دەزگا ئەمنییەکان بکوژەکە ئاشکرا بکەن."
بیرۆکەی کۆنگرەی نەتەوەیی کورد دەگەڕێتەوە بۆ عەبدوڵڵا ئۆجەلان، دواجار لە 22ی تەممووزی 2013، لە شاری ھەولێری پایتەختی ھەرێمی کوردستان بە سەرپەرشتی و چاودێریی راستەوخۆی سەرۆک مەسعود بارزانی یەکەمین کۆبوونەوەی ئامادەکاریی کۆنگرەی نەتەوەیی بەڕێوەچوو، بۆ یەکەم جار 39 حیزبی سیاسی کورد کە نوێنەرایەتیی توێژەکانی گەلی کوردیان لە ھەر چوار پارچەی کوردستان دەکرد، کۆبوونەوە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ