هەڵەیەک روویدا! دووبارە هەوڵبدە
کوردستان
وێنەکە بە ژیریی دەستکرد دروستکراوە و گوزارشتە لەوەی رێگری لە بارهەڵگر دەکرێت بۆ ئەوەی قوتابییان بە سەلامەت بچنە قوتابخانە
رووداو دیجیتاڵ
گوتەبێژی هاتووچۆی سلێمانی رایگەیاند، لەگەڵ دەستپێکردنەوەی دەوامی خوێندن، رۆژانە کاژێرێک هاتنەناوەوەی بارهەڵگرەکان بۆ ناو سەنتەری شار قەدەخە دەکرێت.
وەزارەتی پەروەردە رایگەیاندووە، رۆژی 21-09-2025، وەرزی نوێی خوێندن دەبێت لە سەرجەم قوتابخانەکانی هەرێمی کوردستان دەستپێدەکات.
رۆژی پێنجشەممە، 18ـی ئەیلوولی 2025، بەهمەن عەبدوڵڵا، گوتەبێژی هاتووچۆی سلێمانی بە تۆڕی میدیایی رووداوی راگەیاند: ''بەهۆی دەستپێکردنەوەی وەرزی نوێی خوێندن و لە بەرژەوەندیی قوتابیان، بڕیارمان دا هاتنەناوەوەی بارهەڵگرەکان بۆ ناو شاری سلێمانی لە رێگەی بازگەکان و سنووری شەقامی بازنەیی مەلیک مەحموود، لە کاژێر 07:30 بۆ 08:30 جگە لە رۆژانی هەینی قەدەخە بکرێت''.
گوتەبێژی هاتووچۆی سلێمانی گوتی: ''لە یەکشەممەی هەفتەی داهاتووەوە ئەم بڕیارە جێبەجێ دەکرێت و لە بازگەکان رێگە بە بارهەڵگرەکان نادرێت بێنە ناو شار''.
بە گوتەی بەهمەن عەبدوڵڵا، ئەم بڕیارە بە مەبەستی کەمکردنەوەی قەرەباڵخی و گرفتی هاتووچۆیە. گوتیشی: ''ئەم کارە لەلایەن مەفرەزەکانی بەشی هاتووچۆی بازگەکان و هەردوو هاتووچۆی ناوشاری (رۆژهەڵات و رۆژئاوا) جێبەجێ دەکرێت و بەرامبەر هەر سەرپێچییەک لێپرسینەوەی یاسایی دەکرێت''.
وەکو گوتەبێژی هاتووچۆی سلێمانی گوتی: ''ساڵانە لەگەڵ دەستپێکردنەوەی خوێندن ئەم بڕیارە دەدرێت و تاوەکو پشووی هاوین جێبەجێ دەکرێت''.
بەڕێوەبەرایەتیی هاتووچۆی سلێمانی داوا لە شۆفێران دەکات رەچاوی رێژەی خێرایی بکەن لە ناوچەکانی نیشتەجێبوون و بەردەم ناوەندەکانی خوێندن و ئاگاداری منداڵان و پیادەڕەوەکان بن.
لە راگەیێندراوەکەدا هاتووە: ''داوا لە شۆفێرانی ئەو پاسانە دەکەین کە منداڵ و قوتابی دەگوازنەوە، رەچاوی ژمارەی یاسایی خوێندکاران لەنێو پاسەکانیان بکەن و سەرنشینی زیادە هەڵنەگرن. رێگە بە منداڵان نەدەن بەشێک لە جەستەیان لە پەنجەرەکان بهێننە دەرەوە و لە شوێنی خۆیان دابنیشن. لە کاتی سەرکەوتن و دابەزین لەبەردەم قوتابخانەکان ئاستەنگ دروستنەکەن. مەفرەزەکانی هاتووچۆی ناوشار لە کاتی سەرپێچیکردنی شۆفێرەکان، لێپرسینەوەی یاساییان لەگەڵ دەکەن''.
زیاتر لە 400 هەزار قوتابی لە سنووری پارێزگای سلێمانی لە هەزار و 410 قوتابخانەدا دەخوێنن؛ ئەمە جگە لە پەروەردەکانی ئیدارە سەربەخۆکانی گەرمیان و راپەڕین.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ