رووداو دیجیتاڵ
کەشناسیی هەرێمی کوردستان رایگەیاند، سبەی لە زۆربەی ناوچەکانی هەرێمی کوردستان خۆڵبارین دەبێت و لە چەند ناوچەیەک تاوەباران دەبارێت و پلەی گەرما دادەبەزێت. کەشناسێکیش پێشبینی دەکات، بارانەکە لاواز بێت.
ئەمڕۆ 18ـی ئەیلوول، کەشناسیی هەرێمی کوردستان بڵاویکردەوە: "لە ئێوارەوە ئەگەری چالاکبوونی با لە باشووری رۆژئاوای هەرێمی کوردستان هەیە. پلەی گەرمای ئەمڕۆ نزیک دەبێتەوە لە دوێنێ".
لەبارەی کەشوهەوای سبەینێ، کەشناسی دەڵێت: "لە ناوچە شاخاوییەکان بەتایبەتی ناوچە سنوورییەکانی باکوور و باکووری رۆژهەڵات، نیمچەهەور دەبێت لەگەڵ بەرزبوونەوەی تۆزوخۆڵ لە زۆرینەی ناوچەکان".
کەشناسی ئاماژەی بە یەکەم بارانی ئەم وەرزە کردووە و رایگەیاندووە: "ئەگەری کەمێک تاوەبارانی پچڕپچڕ هەیە لە ناوچە سنوورییەکانی باکووری خۆرهەڵاتی هەرێمی کوردستان".
لە راگەیێندراوەکەدا کەشناسیی هەرێمی کوردستان ئاماژەی بە پلەی گەرمای سبەی کردووە و رایگەیاندووە: "بەراورد بە ئەمڕۆ 5 بۆ 6 پلەی سیلیزی دادەبەزێت".
شاڵاو هیدایەت، پێشبینیکاری کەشوهەوا ئەمڕۆ بە تۆڕی میدیایی رووداوی گوت: "بارانبارینەکە ناوچە شاخاوییەکانی پارێزگاکانی هەولێر و دهۆک و ئیدارەی راپەڕین دەگرێتەوە و لاواز دەبێت".
ئەو کەشناسە گوتیشی: "لە سبەیەوە لەگەڵ خۆڵبارینەکەدا تاوەکو دووشەممە، شەپۆلێکی پاییزە هەرێمی کوردستان دەگرێتەوە و پلەی گەرما پێنج پلە و لە هەندێک ناوچە زیاتریش دادەبەزێت".
هەروەها محەممەد کەمال، پێشبینیکاری کەشوهەوا بە رووداوی گوت: "کاریگەریی خۆڵبارینەکە زیاتر لەسەر کەرکووک، گەرمیان، هەڵەبجه، بەشێکی سلێمانی و دەشتی هەولێر دەبێت و لە ناوچەکانی دیکە لاواز دەبێت".
بەگوێرەی کەشناسیی هەرێمی کوردستان، سبەی پلەی گەرما بەمشێوەیە دەبێت:
هەولێر: 34 پلەی سیلیزی
سلێمانی: 31 پلەی سیلیزی
دهۆک: 32 پلەی سیلیزی
هەڵەبجە: 33 پلەی سیلیزی
کەرکووک: 35 پلەی سیلیزی
گەرمیان: 37 پلەی سیلیزی
زاخۆ: 32 پلەی سیلیزی
سۆران: 29 پلەی سیلیزی
ئامێدی: 26 پلەی سیلیزی
ئاکرێ: 31 پلەی سیلیزی
حاجی ئۆمەران: 21 پلەی سیلیزی
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ