رووداو دیجیتاڵ
حکومەتی عێراق دەرفەتێکی دیکە بۆ خوازیارانی خوێندنی باڵا (ماستەر و دکتۆرا) لە دەرەوەی وڵات دەڕەخسێنێت و هەرێمی کوردستان دەگرێتەوە. سوودمەندبوویەکی دەرفەتەکە دەڵێت: "هەلێکی زۆر باشە بۆ گەنجانی هەرێمی کوردستان، چونکە عێراق سەرجەم تێچووەکەی دەدات".
ستەم کامیل، خوێندکاری دکتۆرا لە زانکۆی شاهانەی بەریتانیا و یەکێک لەوانەی لە دەرفەت (سکۆلەرشیپ)ـەکەی حکومەتی عێراق سوودمەند بووە، ئەمڕۆ پێنجشەممە بە تۆڕی میدیایی رووداوی گوت: "سەرەتای ساڵی نوێ حکومەتی عێراق چوارەم راوندی خوێندنی باڵا لە دەرەوە رادەگەیێنێت، کە هەزار کورسی دەبێت و بەشێکی پشکی هەرێمی کوردستانە".
لە سێ قۆناخی یەکەمدا لەو خوێندکارانەی خوێندنی باڵا چوونەتە دەرەوەی وڵات نزیکەی 200 کەس لە هەرێمی کوردستانەوە سوودمەند بوون.
ستەم کامیل گوتی: "خوێندکاران لەسەر توانا و لێهاتووی خۆیان وەردەگیرێن و دەتوانن داواکاری پێشکێش بکەن نەوەکو گەندەڵی و ناسینی بەرپرسان، بۆیە زۆر گرنگە گەنجانی هەرێمی کوردستانیش فۆڕم پڕبکەنەوە و بتوانن سوود لەو دەرفەتە وەربگرن".
لەبارەی تێچووی خوێندنەکەوە ستەم کامیل کە لە بەریتانیاوە گوتی: "پارەی خوێندن، بیمەی تەندروستی، خەرجیی تیکتی هاتووچۆ و بژێوی مانگانەش لە ئەستۆی حکومەتی عێراقە".
سکۆلەرشیپەکە لە رێگەی لیژنەی باڵای پەرەپێدانی خوێندن لە عێراق سەرەتای ساڵی نوێ رادەگەیێندرێت و پشکی هەرێمی کوردستان تێیدا پارێزراوە.
ستەم کامیل دەڵێت: "لە کاتی بردنەوەی سکۆلەرشیپەکەدا، بەربژێر دەبێت لە ماوەی دوو ساڵدا قبوڵی خوێندن لە زانکۆیەکی باوەڕپێکراوی دەرەوەی وڵات بەدەستبهێنێت، ئەگەر نەیتوانی لەو ماوەیەدا رەزامەندنی زانکۆیەک وەربگرێت، ئەوا کورسی خوێندنەکەی لە دەست دەدات".
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ