رووداو دیجیتاڵ
شەش چەکداری داعش لە سنووری نێوان خورماتوو و کفری گەمارۆی سێ شوانی کوردیان دا. فەرماندەیەکی پێشمەرگە دەڵێت، سێ شوانەکە سەلامەتن و پێشمەرگە بەهانایانەوە چووە.
ئەمڕۆ چوارشەممە، 19ـی شوباتی 2025، فەرماندەیەکی پێشمەرگە لە سنووری گەرمیان بە تۆڕی میدیایی رووداوی گوت، "نیوەڕۆی ئەمڕۆ لە گوندی دوڕاجی کە دەکەوێتە نێوان خورماتوو و کفری، سێ شوانی کورد کە خەریکی لەوەڕاندنی مەڕوماڵاتەکانیان بوون، لەلایەن شەش چەکداری داعشەوە گەمارۆ دران."
ئەو فەرماندەیە گوتیشی، "ئەو سێ شوانە چەکیان پێبووە و بەرەنگاری چەکدارە داعشەکان بوونەتەوە، دوای شەڕەتەقەیەکی زۆر، هێزەکانی پێشمەرگە و هێزە ئەمنییەکانی دیکە بەهانایانەوە چوون و رزگارکران و، داعشەکان هەڵاتن."
بە گوتەی ئەو فەرماندەیەی پێشمەرگە، "ئەو ناوچەیە جموجۆڵی چەکدارانی داعشی تێدایە و شوانەکان زۆر لە ئاوەدانی دوورکەوتوونەتەوە، بۆیە ئەو چەکدارانە بە هەلیان زانیوە و هێرشیان کردووەتە سەریان."
ئەو سەرچاوەیە ئاماژەی بەوەکرد، "هەر سێ شوانەکە سەلامەتن، بەڵام چەند سەر مەڕێک بەهۆی شەڕەتەقەکەوە مرداربوون."
گوندی دوڕاجی، کەوتووەتە ناحیەی نەوجول لە قەزای کفری.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ