رووداو دیجیتاڵ
ئەمڕۆ لە دادگەی بنەسڵاوەی پارێزگای هەولێر، بە بڕیاری دادوەر سزای زیندانیی چوار ساڵ و پێنج مانگی دیکە بۆ چالاکڤانی حوکمدراو شێروان شێروانی دەرکرا. پارێزەرەکەی دەڵێت: "بڕیارەکە دەبەینە دادگەی پێداچوونەوە".
شێروان شێروانی، کە لە ساڵی 2021ـەوە لە زیندانە، پێشتر سەرۆکی هەرێمی کوردستان سزاکەی بۆ نزیکەی نیوە کەمکردبوویەوە و دەبوو لە ئەیلوولی 2023 ئازاد بکرایە.
دوای دانیشتنی دادگە، محەممەد عەبدوڵڵا، یەکێک لە پارێزەرەکانی شێروان شێروانی گوتی: "دانیشتنی دادگەکە لەسەر سکاڵای کەسێک بووە بە ناوی رائید دڵدار بە مادەی 229 لە یاسای سزادانی عێراقی".
بە گوتەی پارێزەکەی، لە دەرەوەی دادگە "دەستوەردان" لە دۆسیەی شێروان شێروانی هەبووە و گوتی: "پێش دانیشتنی دادگە و لە دەرەوە سزاکەیان سەپاندبوو".
پارێزەر محەممەد عەبدوڵڵا ئاماژەی بەوەکرد: "بەبێ بەڵگەی یەکلاکەرەوە دادگە سزاکەی بۆ ماوەی چوار ساڵ و پێنج مانگ بڕیوەتەوە".
پارێزەرەکەی شێروان شێروانی گوتی، تانە لە بڕیارەکە دەدەن و گوتی: "هیوادارین لە دادگەی پێداچوونەوە بڕیارەکە هەڵوەشێندرێتەوە".
لە کۆنگرەکەدا برایەکی شێروان شێروانی گوتی: "شێروان هیچ گوناهێکی نییە، ئەوە شەرمێکی گەورەیە حیزب و رێکخراوەکان بێدەنگ بن".
هەروەها عەلی حەمەساڵح، ىڕیاردەری رەوتی هەڵوێست لە کۆنگرەکەدا گوتی: "تۆمەتەکە ئەوەیە گوایە شێروان شێروانی لە زینداندا هەڕەشەی لە ئەفسەرێک کردووە، زیندان هەمووی کامێرایە و ئەگەر وایە با یەک گرتەی ڤیدیۆیی بڵاو بکەنەوە، کە بیسەلمێنێت شێروان هەڕەشە و شەڕی کردووە".
دوای چەند مانگێک لە دەستگیرکردنیان، دادگەی تاوانی هەولێر، 16-02-2021 بە تۆمەتی "تێکدانی ئاسایشی نیشتمانی"، هەریەک لە شێروان شێروانی، ئەیاز کەرەم، گوهدار محەممەدئەمین، هاریوان عیسا و شڤان سەعیدی بە یەکی شەش ساڵ زیندانیکردن سزادا.
شوباتی 2022 بە فەرمانی نێچیرڤان بارزانی، سەرۆکی هەرێمی کوردستان 60%ـی سزاکەیان لابرا، جگە لە شێروان شێروانی کە 50% کەمکرایەوە.
دوای فەرمانەکەی سەرۆکی هەرێمی کوردستان، 16-03-2023 سێ کەس لە حوکمدراوان کە بریتی بوون لە ئەیاز کەرەم، هاریوان عیسا و شڤان سەعید ئازادکران و دوای دوو سزای دیکە، گوهدار محەممەدیش ئازاد کرا.
بەگوێرەی بڕیارەکەی سەرۆکی هەرێمی کوردستان، دەبوو ئەیلوولی 2023 شێروان شێروانی ئازاد بکرایە، بەڵام پێش ئەو کاتە و لە 20ـی تەمموزی 2023، شێروانی بە مادەی 298 و 295 لە یاسای سزادانی عێراق، بە چوار ساڵ بەندکردن سزا درایەوە.
لەبارەی هۆکاری چوار ساڵەکەی شێروان شێروانی، ئەو کات رەمەزان ئەرتیسی، یەکێک لە پارێزەرەکانی بە رووداوی گوت: "ساڵی 2022 داوای ئازادکردنی مەرجدارمان بۆ ئەیاد کەرەم، شڤان سەعید، گۆهدار زێباری و هاریوان عیسا کرد، بەڵام نەکرا و دواتر گوتمان مادەم ناکرێت با بڕیارەکە هەڵبوەشێنینەوە."
پارێزەرەکە گوتیشی: "بۆ واژۆی هەڵوەشاندنەوەی بڕیارەکە هەموو گیراوان بەدەستی خۆیان واژۆیان کرد، تەنیا گۆهدار زێباری نەبێت کە ئەو کات لە زیندانی تاکە کەسی بوو و داوای کرد شێروان شێروانی لەبری ئەو واژۆ بکات و ئەویش واژۆی بۆ کرد. دادگە لەسەر ئەو بابەتە بە چوار ساڵی دیکە سزای شێروانی دایەوە."
دواتر هەر بەگوێرەی بڕیارەکەی سەرۆکی هەرێمی کوردستان، چوار ساڵەکە کرایەوە بە دوو ساڵ و بڕیاربوو 16ـی ئەیلوولی 2025 ئازاد بکرێت، بەڵام لە 16ـی ئاداردا دادوەر رەتیکردەوە و رایگەیاند، دەبێت شەش مانگی دیکە لە زینداندا بمێنێتەوە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ