تەرمی سێ کارمەندەکەی دژەتیرۆری سلێمانی بە خاک سپێردران

 

ئیڤان عەدنان یەکێک بوو لە "شەهیدەکان" و دوو منداڵی لەدوای خۆی جێهێشت. هاوار عوسمان 15 ساڵ هاوڕێی ئیڤان عوسمان بووە، لە رێوڕەسمی بەخاکسپاردنەکەی بە رووداوی گوت، "ئێمە 15 ساڵ هاوڕێ بووین، رۆژێک نیگەرانیمان نەبوو، بەڕاستی ئازاری [لەدەستدانی] زۆر سەختە." 

 

گۆڕستانی کەڵکن لە سلێمانی، بووە دوا مەنزڵی رابەر ئەنوەر و دوو منداڵەکەی جێهێشت، رابەریش لە رووداوەکەی دوێنێی فڕۆکەخانەی عەربەت "شەهید" بوو. 

 

باوکى رابەر، سەرەڕای هەموو ئازارە دەروونییەکانی، بە رووداوی گوت، "کاتێک دەبینم ئەم هەموو خەڵکە لە چواردەورمن، ئازارەکەم کەم دەبێتەوە، کوڕی من لە رێگەی کوردستان و کارێکی جواندا گیانی بەخت کردووە و شانازیی دەکەم."

 

هیوا قادر، یەکێکی دیکە لە "شەهیدەکان" بوو، ئەو لە گۆڕستانى شێخ محێدین لە کەرکووک کەسوکارەکەی بۆ دوایین جار ماڵئاواییان لێکرد، هیوا، هێشتا ژیانى هاوژینى پێکنەهێنابوو. 

 

ئاسۆ مامەند، ئەندامی مەکتەبی سیاسیی یەکێتی لەبارەی "شەهیدبوونی" سێ ئەندامەکەی دژەتیرۆر بە رووداوی راگەیاند، "دژەتیرۆر شوێن نەماوە قووربانی بۆ نەدات، بەڕاستی عێراق بەرپرسیارە لە لێکۆڵینەوەی ئەم تاوانە."

 

تاوەکو ئێستا جگە لە گوتەبێژی هێزە چەکدارەکانی عێراق کە گوتی، درۆنەکە لە تورکیاوە هاتووەتە عێراق و سلێمانی، هیچ وڵات و لایەنێک خاوەندارێتی هێرشەکەی نەگرتووەتە ئەستۆ.

وەزارەتی دەرەوەی تورکیاش ئەمڕۆ سێشەممە، 19-9-2023، راگەیێندراوێکی لەبارەی رووداوەکەی فڕۆکەخانەی عەربەت لە پارێزگای سلێمانی بڵاوکردەوە و تێیدا هاتووە، "پێشهاتەکانی ئەو تەقینەوەیەی رۆژی 18ی ئەیلوولی 2023 لە فڕۆکەخانەی عەربەت لە سلێمانی روویاندا جێگەی سەرنجن. وا زانراوە لەکاتی تەقینەوەکەدا ئەندامانی گرووپی دژە تیرۆری سەر بە یەکێتی لەگەڵ تیرۆریستانی پەکەکە/یەپەگە راهێنانیان کردووە. ئەم پێشهاتە بە روونی، بوونی هاوئاهەنگی بەشێک لە بەرپرسانی ئەمنیی یەکێتی لەگەڵ ئەندامانی رێکخراوی تیرۆریستی نیشاندەدات."