رووداو دیجیتاڵ
لە کەلار هەوڵی کردنەوەی یانەیەکی شەوانە دەدرێت، چالاکڤانانی ئیسلامی و بەشێکی خەڵک لە تۆڕە کۆمەڵایەتییەکان رەتیدەکەنەوە و چالاکڤانێکیش بە "ئاسایی" دەزانێت. قایمقام دەڵێت رێگەنادەن و گەشتوگوزاریش ئاماژە بەوە دەکات، یاسا رێگە دەدات، بەڵام رەچاوی بۆچوونی خەڵکی ناوچەکەش دەکرێت.
دوو رۆژە لە تۆڕە کۆمەڵایەتییەکان لە سنووری ئیدارەی سەربەخۆی گەرمیان دەیان بابەت بڵاوکراوەتەوە و باس لە هەوڵی کردنەوەی یانەیەکی شەوانە لە کەلار دەکرێت، زۆرینەی بڵاوکراوەکان دژی هەوڵەکەن.
لە هەرێمی کوردستان یاسایەکی تایبەت بە گەشتوگوزار هەیە و تێیدا پێدانی مۆڵەت بە دروستکردنی شوێنی تایبەت بە یانەی شەوانە رەتنەکراوەتەوە و روونیش نەکراوە پێیدەدرێت، بەڵام ئاماژە بەوە کراوە، بۆ وەرگرتنی مۆڵەتی هەموو پڕۆژەکان، دەبێت داوا لە بەڕێوەبەرایەتییەکانی گەشتوگوزار بکرێت.
عەلی حوسێن، ئەندامی دەستەی کارگێڕیی رێکخراوی هانای خێرخوازی کە بەدواداچوونی بۆ بابەتەکە کردووە، ئەمڕۆ یەکشەممە بە تۆڕی میدیایی رووداوی گوت: "هەوڵێک هەیە بۆ دروستکردنی یانەی شەوانە و باڕ لە کەلار، ئێمە و سەتان کەسی دیکەش ئەو هەوڵە رەتدەکەینەوە".
بە گوتەی عەلی حوسێن، ئەو شوێنەی هەوڵ هەیە بکرێتە یانەی شەوانە، نزیک قەڵای شێروانەیە لە شاری کەلار. گوتیشی: "ئەو کەسەی دەیەوێت یانەکە بکاتەوە خەڵکی دەرەوەی گەرمیانە، لەگەڵ بەرپرسان لەسەر هێڵ دەبین و رێگە نادەین ئەوە لە کەلاردا بکرێتەوە".
چالاکڤانێکی ناوچەکە بە تۆڕی میدیایی رووداوی گوت: "کردنەوەی یانەی شەوانە ئاساییە، راستە زۆرینە دژی کردنەوەین، بەڵام بۆ لە شارەکانی هەولێر، سلێمانی و دهۆک هەبن و لە کەلار نەبێ، خۆ ئەو ناوچانەش دانیشتووانەکەی موسڵمانن".
بە گوتەی ئەو چالاکڤانە، "ئێستاش رۆژانە خەڵک هەن لە سنووری گەرمیانەوە بۆ یانەی شەوانە دەچنە شارەکانی دیکە".
قایمقامی کەلار: رێگەنادەین یانەی شەوانە بکرێتەوە
قایمقامی قەزای کەلار ئاماژە بەوە دەکات، ئەگەر یاساش رێگەی بدات لەبەر دابونەریتی خەڵکی ناوچەکە رێگە نادەن یانەی شەوانە بکرێتەوە.
عارف عادل، قایمقامی قەزای کەلار ئەمڕۆ بە تۆڕی میدیایی رووداوی گوت: "هیچ کەسێک بە فەرمی داوای کردنەوەی یانەی شەوانەی نەکردووە، نە لە ئێمە و نە لە بەڕێوەبەرایەتیی گەشتوگوزار، داواش بکەن رێگەی نادەین".
قایمقامی کەلار گوتی: "سرووشتی کەلار و گەرمیان بە جۆرێکە بۆ یانەی شەوانە نابێ و خەڵکەکەش رەتیدەکاتەوە، بۆیە داواکاریشمان بۆ بێ مۆڵەت نادەین".
لە وەڵامی ئەو پرسیارەی، کە ئەگەر ئەو کەسەی دەیەوێت یانەی شەوانە بکاتەوە پشت بە یاسا و رێنماییە کارپێکراوەکان ببەستێت هاوشێوەی شارە گەورەکانی هەرێمی کوردستان، قایمقامی کەلار گوتی: "یاسا سەروەرە و لە سەرووی هەموومانەوەیە، بەڵام هەندێک کات ئەمری واقیع ئەوە قبووڵ ناکات، ئێمەش کوڕی ئەو خەڵکەین، کە ئەوەی قبووڵ نییە".
گەشتوگوزار: یاسا رێگە بە کردنەوەی یانەی شەوانە دەدات
هێرش فەیزوڵڵا، بەڕێوەبەری گەشتوگوزاری گەرمیان بە تۆڕی میدیایی رووداوی گوت: "هیچ داواکارییەکی لەو شێوەیە بە ئێمە نەدراوە، نازانین وروژاندنەکەی کێی لەپشتە، چونکە لە قازانجی کۆمەڵگە و کەلار و کەس نییە".
بەڕێوەبەری گشتیی گەشتوگوزاری گەرمیان گوتیشی: "ئەگەر داواکارییەک بۆ کردنەوەی یانەی شەوانە هەبێ، ئێمە بە دزییەوە نایکەین، ئێمە حکومەتین و مۆڵەتی دەوێ، مۆڵەتیش تەنیا ئێمە نین، دەبێ رەزامەندیی ئاسایش، شارەوانی، باج و خانووبەرە، باجی دەرامەت و چالاکییە مەدەنییەکان هەبێ، ئەو داوایەش لە ئێمە نەکراوە".
هێرش فەیزوڵڵا ئاماژەی بەوەکرد، "پێشتریش داواکاریی پڕۆژەی لەو بابەتە هەبووە [شوێنێکی رێستۆرانت و لایڤ میوزیک بوو] رێگەی نەدرا، دوای دوو ساڵ هێنان و بردن یەک واژۆی مابوو، بۆی نەکرا، چونکە خەڵک هەبوو دژی بوو".
سەبارەت بە پێدانی مۆڵەت بە یانەی شەوانە، هێرش فەیزوڵڵا گوتی: "ئەگەر کەسی داواکار پشت بە یاسا ببەستێت، ئێمە مۆڵەتی پێدەدەین، بەڵام رەچاوی تایبەتمەندیی کۆمەڵایەتیی ناوچەکان دەکرێ، بەتایبەت بزانین لەگەڵ کۆمەڵگەی ئێرەدا ناگونجێ و زۆرینە دژی دەبن، ئێمەش رەچاوی ئەوە دەکەین".
بەڕێوەبەری گەشتوگوزاری گەرمیان رێکارەکانی رەتکردنەوەی دانانی یانەی شەوانەی دوای وەرگرتنی مۆڵەتی یاسایی لەلایەن کەسی داواکراوەوە بەمشێوەیە خستەڕوو، "ئەو شوێنەی مۆڵەتەکە وەردەگرێت نزیکی هەر ناوچەیەک بێ خەڵکی دەوروبەری دەتوانن لە دژی یاداشتێکی ناڕەزایی واژۆ بکەن و بیدەنە ئێمە، ئەوکات ئێمە سەیری دەکەین و رەچاوی داوای خەڵک دەکەین".
یاسای گەشتوگوزار لە هەرێمی کوردستان
لە هەرێمی کوردستان یاسای ژمارە 9ـی ساڵی 2022 بەرکارە بە ناوی (یاسای گەشتوگوزار لە هەرێمی کوردستان – عێراق) کە پێکهاتووە لە 32 مادە و هۆیەکانی دەرچوواندنی.
لە تەواوی مادەکانی یاساکەدا باس لە پێدانی مۆڵەت بە هیچ پڕۆژەیەکی گەشتیاریی دیاریکراو نەکراوە، کە یانەی شەوان بێت یان رێستۆرانت، بەڵکو تەنیا ئاماژە بە پڕۆژە گەشتیارییەکان بەگشتیی کراوە و ئاماژە بەوەکراوە، "ئاسانکاری"ی بۆ پێدانی مۆڵەت بکرێت بۆیان.
لە خاڵی سێیەمی بەشی یەکەمی مادەی 3ـی یاسای گەشتوگوزاردا هاتووە: "پێدانی مۆڵەتی کارکردنی شوێن و دامەزراوە گەشتیارییەکان بەگوێرەی یاسا و رێنماییە بەرکارەکان بە هاوئاهەنگی لەگەڵ لایەنە پەیوەندیدارەکان"دا دەبێت.
لە یاساکەدا زیاتر لە چەند جارێک بڕی پارەی سزادانی شوێنە گەشتیارییەکان خراوەتەڕوو، بەڵام زۆرینەیان تایبەتکراون بە نوێنەکردنەوەی مۆڵەت یان پێدانی زانیاری نادروست لەکاتی مۆڵەتدا، نەوەکو جۆری شوێنە گەشتیارییەکە.
لە هەولێر، سلێمانی و دهۆک یانەی شەوانە هەن و بە فەرمی مۆڵەتی کارکردنیان هەیە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ