هەڵەیەک روویدا! دووبارە هەوڵبدە
د. گۆڤەند شێروانی میوانی (رۆژی هیوا جەمال) بوو
رووداو دیجیتاڵ
د. گۆڤەند شێروانی، بەربژێری پارتی دیموکراتی کوردستان بۆ پەرلەمانی عێراق لە بازنەی هەولێر رایگەیاند، بەرنامەی سەرەکیی خۆی و حزبەکەی لە بەغدا بریتییە لە "پاراستنی پێگە و قەوارەی دەستووریی هەرێمی کوردستان" و داکۆکیکردن لە مافە دەستووری و یاساییەکانی، بەتایبەتی لە دۆسیەکانی بودجە، نەوت و گازدا.
د. گۆڤەند شێروانی کە پسپۆڕی بواری نەوت و وزەیە، گوتی، "ئەگەر دەربچم، کاری جیدی دەکەم بۆ دەرکردنی یاسای نەوت و گاز". باسی لەوەش کرد، "عێراق پێویستی بە یاسایەکی بەهێزی بودجە هەیە".
ئەمڕۆ یەکشەممە، 19-10-2025، لە کاتی بەشداریکردنی لە بەرنامەی ( رۆژی هیوا جەمال)، د. گۆڤەند شێروانی ئاماژەی بەوە کرد، کار لەسەر دەرچوواندنی یاسایەکی دادپەروەرانەی نەوت و گاز دەکات، چونکە بە گوتەی ئەو، ئەم یاسایە نەک هەر بۆ هەرێمی کوردستان، بەڵکو بۆ هەموو عێراق گرنگە، رێگری لە گەندەڵی دەکات و پەیوەندییەکانی نێوان هەولێر و بەغدا لە چوارچێوەی دەستووردا رێکدەخاتەوە.
سەبارەت بە پشکی هەرێمی کوردستان لە بودجەی فیدراڵی، شێروانی روونیکردەوە، بەپێی دەستوور و بە رەچاوکردنی زیانەکانی رژێمی بەعس، دەبێت پشکی هەرێمی کوردستان زیاتر بێت لە 12.6%، بەڵام ئەوەی ئێستا بە کردەیی دەگاتە هەولێر کەمترە لە 8%.
د. گۆڤەند شێروانی ئاماژەی بەوە دا، "پشکی هەرێمی کوردستان دەبوو ساڵانە 16 تریلیۆن دینار بێت، بەڵام ئەوەی بە مووچەشەوە پلانی بۆ دانراوە بیگاتە هەولێر، ناگاتە 11 تریلیۆن دینار، ئەمەش نادادپەروەرییەکی گەورەیە و پێشێلکردنی مافە دەستوورییەکانمانە."
بەربژێرەکەی پارتی رەخنەی لە حکومەتی ئێستای عێراق گرت و ئاماژەی بەوەدا "هاوپەیمانیی ئیدارەی دەوڵەت" کە حکومەتی لەسەر پێکهاتبوو، خەریکە هەڵدەوەشێتەوە و متمانە لەنێوان لایەنەکاندا نەماوە، ئەمەش کاریگەریی نەرێنی لەسەر دۆخی سیاسیی عێراق و پەیوەندییەکانی لەگەڵ هەرێمی کوردستاندا هەبووە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ